Կառավարությունը մտադիր է մեղմել հարկա-բյուջետային կանոնները՝ փոփոխելով երկրի ՀՆԱ-ում պետական պարտքի շեմի կարգավորման նորմերը։ Համապատասխան օրինագիծը հաստատվել է կառավարության նոյեմբերի 23-ի նիստում:
Ներկայացնելով օրենքի նախագիծը՝ ֆինանսների նախարար Վարդան Արամյանը նշել է, որ «Պետական պարտքի մասին» գործող օրենքի համաձայն, եթե պետական պարտքի չափը գերազանցում է 50 տոկոսը, ապա պետական բյուջեի հաջորդ տարվա դեֆիցիտի ցուցանիշը պետք է ծրագրվի վերջին երեք տարիների ՀՆԱ միջին ցուցանիշի ոչ ավելի, քան 3 տոկոսի չափով:
«Դեռեւս այս տարվա հունիսին մենք ԱՄՀ փորձագետներին խնդրել ենք ներկայացնել այդ ուղղությամբ համաշխարհային փորձը: Եվ դրա հետ մեկտեղ, գործակցել մեզ հետ՝ բարելավելու հարկա-բյուջետային կանոններն այն առումով, որ մի կողմից չգնանք մեղմելու, իսկ մյուս կողմից՝ բարենպաստ պայմաններ ստեղծելու հնարավորություն ունենանք, որը կապահովի երկրի հետագա տնտեսական աճը», - նշել է Արամյանը:
ԱՄՀ առաջարկների համաձայն՝ առանձնացվել են երեք մակարդակներ՝ պետբյուջեի շեմի 40, 50 եւ 60 տոկոսներ: Ինչպես հստակեցրել է ֆինանսների նախարարը, նոր կանոնները գործելու են ինչպես կարճաժամկետ, այնպես էլ միջնաժամկետ եւ երկարաժամկետ հեռանկարների դեպքում;
«Եթե պետական պարտքը 40 տոկոսից ավելի է, ապա պեք է գործի այն չափանիշը, որտեղ կապիտալ ծախսերը պետք է ավելին լինեն, քան դեֆիցիտը: Ընդ որում, պետբյուջեի 2018-ի նախագիծը կառուցվել է՝ ելնելով հենց այդ տրամաբանությունից: Եթե գերազանցում է 50 տոկոսը, ապա պհանջները խստանում են. Առաջին չափանիշի գործելու հետ մեկտեղ, նաեւ պայման է դրվում շեշտը դնել ընթացիկ ծախսերի վրա: Իսկ եթե գերազանցում է 60 տոկոսը, ապա հետագա խստացումը կատարվում է առ այն, որ ընթացիկ ծախսերը իրականացվեն նաեւ սեփական ռեսուրսների հաշվին», - հստակեցրել է Վարդան Արամյանը:
