Լյուքս Ստեփանյանի գործով ազատազրկված Դավիթ Խաչատրյանի գործով հարազատները 2.5 տարի է, ինչ դիմել են Մարդու իրավունքների եվրոպական դատարան, սակայն դեռ ոչ մի նորություն չունեն: Այս մասին NEWS.am-ին ասաց ազատազրկվածի եղբայրը` Վարդան Խաչատրյանը:
«2,5 տարի է, ինչ դիմել ենք ՄԻԵԴ, սակայն ոչ մի պատասխան մինչեւ հիմա չունենք: Ճիշտ է դիմումը քննում են 4 տարվա ընթացքում, բայց մենք որեւէ հույս չունենք, որ որեւէ պատասխան կստանանք»,-ասաց նա:
Վարդան Խաչատրյանն ավելացրեց, որ իրենք հույսներն արդեն կորցրել են, եւ ուրիշ ատյանների չեն էլ պատրաստվում դիմել. «Էլ ո՞ւմ դիմենք, էլ մարդ էլ չկա, որ դիմենք, մնում ա մեր ժեկի պետին դիմենք»:
Հիշեցնենք, որ ողբերգությունը կատարվել էր 2013թ. մայիսի 15-ին, ժամը 15:30-ի սահմաններում, Հայաստանի ՊՆ N զորամասի պահակախմբի մուտքի դիտորդ, ժամկետային զինծառայող, 19-ամյա շարքային Դավիթ Ռաֆայելի Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետեւանքով պահակախմբում ընդգրկված ժամկետային զինծառայող, շարքային Լյուքս Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Վաղինակի Սարգսյանը գլխի շրջանում հրազենային վիրավորում էր ստացել: Դավիթ Խաչատրյանը, որը պնդում էր, որ կատակով է կրակել, զենքը ուղիղ Լյուքսի վրա չի պահել, եւ գնդակն անդրադարձով է դիպչել Լյուքսին, մեղավոր է ճանաչվել Տավուշի մարզի առաջին ատյանի դատարանի կողմից եւ դատապարտվել 17 տարվա ազատազրկման:Վերաքննիչ դատարանը անփոփոխ էր թողել վճիռը: Նրանք Վճռաբեկ դատարան բողոք էին ներկայացրել՝ պահանջելով վերաորակել արարքը, գործը ուղարկել նոր քննության, սակայն բողոքը մերժվել էր: