Հունգարիայի կառավարությունը արգելափակել է Ուկրաինայի հետ ՆԱՏՕ-ի համագործակցության ընդլայնման ծրագիրը: Երկրի վարչապետ Վիկտոր Օրբանը հույս ունի այս կերպ ճնշում գործադրել Ուկրաինայի նախագահ Պյոտր Պորոշենկոյի վրա, հայտնում է dpa-ն:
Գործակալության տեղեկություններով՝ Հյուսիսատլանտյան դաշինքի 11 երկիր, այդ թվում՝ Գերմանիան, Բուդապեշտին են դիմել նամակով, որում Հունգարիայի իշխանություններին կոչ են արել չփորձել ՆԱՏՕ-ի միջոցով Կիեւի վրա ճնշում գործադրել: Երկկողմանի վեճերը չպետք է անդրադառնան Հյուսիսատլանտյան դաշինքում համագործակցության վրա, նշված է ուղերձում:
ՆԱՏՕ-ի մամուլի ծառայությունը ի պատասխան գործակալության հարցման չի մեկնաբանել այս փաստաթուղթը: «ՆԱՏՕ-ն Ուկրաինայի հետ գործնական համագործակցությունը շարունակում է»,- հայտնել է դաշինքի պաշտոնական ներկայացուցչի տեղակալը՝ նշելով, որ հաջորդ շաբաթ ՆԱՏՕ-Ուկրաինա հանձնաժողովի հանդիպում կկայանա դեսպանների մակարդակով: dpa-ի տեղեկություններով՝ Բուդապեշտը շարունակում է արգելափակել ավելի բարձր մակարդակով հանդիպումը:
Երկու երկրների միջեւ վեճը ծագել է սեպտեմբերին Ոկրաինայի Գերագույն ռադայի կողմից «Կրթության մասին» օրենքն ընդունելուց հետո: Հունգարիայի վրդովմունքն էր հարուցել հատկապես 7-րդ հոդվածը, որի համաձայն 2018-ից երկրում կրթությունը կկատարվի պետական լեզվով: Հունգարիայի ԱԳՆ-ն պնդում է, որ բարեփոխումը խախտում է ազգային փոքրամասնությունների եւ Ուկրաինայում բնակվող անդրկարպատյան հունգարների իրավունքները: