Նոր մոտեցում է առաջարկվում, որի համաձայն՝ համայնքների զարգացումը կապվում է նոր մոդելին, որը վերեւից ներքեւ շարժում է ենթադրում: Այս մասին դեկտեմբերի 9-ին Դիլիջանում անցկացվող տեղական ինքնակառավարման եւ տարածքային կառավարման մարմիններին նվիրված խորհրդաժողովի ժամանակ լրագրողների հետ զրույցում ասաց Դիլիջանում Կենտրոնական բանկի Ուսումնահետազոտական կենտրոնի ղեկավար Մարտին Գալստյանը:
Նրա խոսքով՝ նախկինում համայնքները սահմանափակված էին նրանց տրամադրվող եկամուտներով, իսկ աճի բացակայության դեպքում շատ գաղափարներ անհնար էր իրականացնել:
«Նոր հայեցակարգի համաձայն՝ համայնքներն ավելի մեծ պատասխանատվություն են ստանձնում, եւ ներքեւից վերեւ շարժման ճանապարհով, նրանց աճի պոտենցիալը չի սահմանափակվում»,- պարզաբանեց Գալստյանը՝ հավելելով, որ ԿԲ-ի կողմից նոր ֆինանսական մեխանիզմներ եւ նոր մոտեցումների հնարավորություններ կտրամադրվեն, որոնք կառավարությանը եւ համայնքների ղեկավարներին թույլ կտան այս խնդիրներն ավելի արդյունավետ լուծել եւ զգալի տնտեսական աճ ապահովել:
Միեւնույն ժամանակ նա պարզաբանեց, որ սա ենթադրում է նոր համատեղ ֆոնդերի, ինչպես նաեւ ֆինանսական գործիքների ստեղծում, որոնց պատասխանատվությունը կկրեն համայնքները: Այսպես, նրա խոսքով, մասնավոր եւ պետական ֆոնդերի համատեղ մասնակցությամբ համայնքների զարգացման համար զգալիորեն ավելի շատ միջոցներ ներգրավելու հնարավորություն է ստեղծվում:
