Սաուդյան Արաբիայի ԱԳ նախարար Ադել ալ Ջուբեյրը ԱՄՆ-ին կոչ է արել վերանայել Երուսաղեմն Իսրայելի մայրաքաղաք ճանաչելու մասին որոշումը, հայտնում է «ՌԻԱ Նովոստի»-ն։
«Սաուդյան Արաբիան ԱՄՆ վարչակազմին կոչ է անում վերանայել Երուսաղեմի մասին իր որոշումը»,- ասել է նախարարը Կահիրեում Արաբական պետությունների լիգայի ԱԳ նախարարների արտահերթ նիստում։
ԱՄՆ նախագահը չորեքշաբթի Սպիտակ տանը հայտարարել էր, որ ժամանակն է Երուսաղեմը պաշտոնապես ճանաչել Իսրայելի մայրաքաղաք եւ Պետդեպարտամենտին հանձնարարել էր սկսել Թել Ավիվից դեսպանատունը Երուսաղեմ տեղափոխելու գործընթացը։
Երուսաղեմի կարգավիճակը պաղեստինա–իսրայելական հակամարտության առանցքային խնդիրներից է։ Իսրայելցիները 1967 թվականի պատերազմի ժամանակ զբաղեցրել էին քաղաքի արեւելյան հատվածը եւ պնդում են, որ Երուսաղեմը Իսրայելի միասնական եւ անբաժանելի մայրաքաղաքն է։ Պաղեստինցիները ցանկանում են քաղաքի արեւելյան հատվածը դարձնել իրենց պետության մայրաքաղաք։
