Այնպիսի զգացողություն է առաջանում, որ Հայաստանում օրինականացնում են պետական վարկային միջոցների նախկին ապօրինի օգտագործումը: Այս մասին դեկտեմբերի 12-ին ԱԺ-ում «Հայաստանի Հանարապետության բյուջետային համակարգի մասին» եւ «Պետական պարտքի մասին» օրենքներում փոփոխություններ եւ լրացումներ կատարելու օրինագծի քննարկման ժամանակ ասաց ԱԺ փոխնախագահ Միքայել Մելքումյանը:
Նրա խոսքով՝ եթե նոր կանոն է մտցվում, որը նախկինում չի գոծել, ապա կարող է կարծիք առաջանալ, որ մինչեւ այս կանոնը մտցնելը ոչ մի կանոն ընդհանրապես չի եղել: «Հարցեր են ծագում: Մասնավորապես՝ եթե դուք այդ միջոցներն օգտագործել եք առանց այս կանոնի առկայության, ապա ինչպե՞ս եք գործել: Դուք խաղի նոր կանոն եք մտցնում եւ ասում եք՝ իբր, այ հիմա կանոն կսահմանենք, որովհետեւ երկիրը հայտնվել է ռիսկի գոտում»,- նշեց Մելքումյանը՝ հավելելով, որ իրականում վարկերը նախատեսում են ենթակառուցվածքների զարգացում, որոնք իրենց հերթին կբերեն տնտեսական զարգացման եւ աճի: