Իրանի խորհրդարանը իսլամական երկրներին կոչ է արել խզել դիվանագիտական հարաբերությունները Իսրայելի հետ եւ նվազագույնի հասցնել ԱՄՆ-ի հետ տնտեսական կապերը ԱՄՆ նախագահ Դոնալդ Թրամփի՝ Երուսաղեմի վերաբերյալ ընդունված որոշումից հետո, հաղորդում է «ՌԻԱ Նովոստի»-ն: Անցյալ շաբաթ ԱՄՆ նախագահ Դոնալդ Թրամփը հայտարարեց Երուսաղեմի՝ որպես Իսրայելի մայրաքաղաք ճանաչման եւ ամերիկյան դեսպանատան՝ Թել-Ավիվից Երուսաղեմ տեղափոխման մասին:
«Մենք՝ Իսլամական խորհրդատվական խորհրդի ներկայացուցիչներս, խնդրում ենք բոլոր իսլամական երկրներին հնարավորինս արագ խզել դիվանագիտական հարաբերությունները սիոնիստական ռեժիմի հետ, ինչպես նաեւ նվազագույնի հասցնել ԱՄՆ-ի հետ տնտեսական կապերը»,- ասված է 290 հոգու համար նախատեսված հայտարարության մեջ, որը ստորագրվել է խորհրդարանի 235 անդամների կողմից:
Հայտարարության մեջ իրանցի օրենսդիրները նշել են, որ այս որոշմամբ Միացյալ նահանգները «վերջին մեխն են խփել Մերձավոր Արեւելքում այսպես կոչված խաղաղ գործընթացի դագաղին»:
ԱՄՆ նախագահի որոշումը դրականորեն ընդունվեց Իսրայելում եւ բացասական արձագանքի արժանացավ աշխարհի բազմաթիվ պետությունների կողմից, առաջին հերթին՝ Մերձավոր Արեւելքի եւ Պաղեստինի: Ամբողջ իսլամական աշխարհում, այդ թվում նաեւ Իսրայելում բարձրացած բողոքի ալիքների հետեւանքով արդեն իսկ հարյուրավոր մարդիկ են տուժել: