ԱՄՆ կառավարությունը պահանջում է 2018-2019 թվականներին ՄԱԿ բյուջեն 250 մլն դոլարով կրճատել, հայտնում է Agence France Presse-ը:
Գործակալության տեղեկություններով՝ ամերիկյան կողմի առաջարկած կրճատումները կարող են վերաբերել Պաղեստինում, Լիբիայում եւ Աֆղանստանում ՄԱԿ առաքելություններին, հանգեցնել համաշխարհային կազմակերպության զարգացման ծրագրի դադարեցմանը եւ նոր աշխատակիցներ չընդունելուն, ինչպես նաեւ անձնակազմի աշխատավարձի կրճատմանը: Ի պատասխան ԱՄՆ առաջարկին՝ ՄԱԿ ներկայացուցիչները ֆինանսավորումը 170 մլն դոլարով կրճատելու պատրաստակամություն են հայտնել:
ՄԱԿ 2018-2019 թվականների բյուջեն նախատեսում են հաստատել մինչեւ տարեվերջ: Agence France Presse-ի տեղեկություններով՝ կազմակերպությունն իր կարիքների համար 5,4 մլրդ դոլար է խնդրում, ինչը 200 մլն դոլարով պակաս է, քան 2016-2017 թվականների բյուջեն:
Կազմակերպության բյուջեն ձեւավորվում է անդամ երկրների անդամավճարների հաշվին: Յուրաքանչյուր երկրի բաժինը հաշվարկվում է՝ ելնելով տասնամյա ժամկետում ՀՆԱ միջին ցուցանիշից՝ հաշվի առնելով բնակչության մեկ շնչին ընկնող եկամուտը եւ արտաքին պարտքը: Այսօրվա դրությամբ ՄԱԿ խոշորագույն հովանավորը ԱՄՆ-ն է, որն ապահովում է կազմակերպության ծախսերի 20 տոկոսից ավելին: