Գերմանիայի ոստիկանությունը եւ հետախուզական ծառայությունը երկարատեւ եւ ավելի ինտենսիվ կերպով հետեւել են ահաբեկիչ Անիս Ամրիի գործողություններին, որն անցյալ տարի ահաբեկչական հարձակում էր կատարել բեռլինյան սուրբծննդյան շուկայի վրա։ Այս մասին հաղորդում է «ՌԻԱ Նովոստի»-ն՝ վկայակոչելով գործակալների տվյալները, տասնյակ փաստաթղթեր ու արձանագրություններ։ Նպատակաուղղված նրան հետեւելը սկսվել էր 2015 թվականի նոյեմբերին։ Նման միջոց ձեռնարկվել էր «Իսլամական պետության» ենթադրյալ բջջի եւ քարոզիչ Աբու Վալի նկատմամբ հետաքննության կապակցությամբ:
Դեռ ահաբեկչական հարձակումից մեկ տարի առաջ Դյուսելդորֆի ոստիկանության քրեական բաժինը ստացել էր Ամրիի կոնկրետ ծրագրերի մասին տվյալներ: Տեղեկությունը փոխանցվել էր դաշնային ոստիկանության քրեական վարչությանը, Սահմանադրության պաշտպանության վարչությանը(հակահետախուզության) եւ գլխավոր դատախազությանը: Ամեն դեպքում, այդ տարվա դեկտեմբերից սկսած Ամրիիի կողմից անընդհատ փոփոխվող բջջային հեռախոսները հսկվում էին։
Ընդհանուր առմամբ, Սահմանադրության պաշտպանության վարչություն էր փոխանցվել Ամրիի մասին տեղեկություններով ավելի քան 12,000 ֆայլ, ներառյալ Լիբիայում ԻՊ-ի զինյալների հետ նամակագրությունը: Welt-ի տվյալներով՝ վարչությունը նույնիսկ այդ գործով առանձին խորհրդատու էր նշանակել: Ավելին, պարբերականը հաղորդում է, որ Ամրին սերտ կապեր է ունեցել ԻՊ-ի Լիբիայի ապստամբների հետ դեռ մինչեւ 2011 թվականին Իտալիա ժամանելը եւ նրանց մասին տեղյակ են եղել Թունիսի հետախուզական ծառայությանը:
Պատճառը, թե ինչու Ամրիին ձերբակալված չէ եւ կարողացել է իրականացնել իր ծրագրերը, հայտնի չէ: Թերթը ենթադրում է, որ դա պայմանավորված է միջազգային հետախուզական ծառայությունների ներգրավվածությամբ, ովքեր ցանկանում էին օգտագործել Ամրիին ԻՊ-ի իր հովանավորների ճնշման համար:
Հիշեցնենք, որ 2016 թ. դեկտեմբերին Բեռլինի կենտրոնական շուկայի վրա բեռնատար մեքենայով հարձակում էր իրականացվել, 12 մարդ զոհվել էր, 48-ը՝ հոսպիտալացվել: Գերմանիայի իշխանությունները հայտարարել էին, որ դա ահաբեկչական հարձակում էր, հետախուզում էր հայտարարվել մեքենան վարելու մեջ կասկածվող 24-ամյա թունիսցի Անիս Ամրիի նկատմամբ, որը սպանվել է Միլանում ոստիկանության բացած կրակահերթից։