Կան մի քանի պատճառներ, որոնք խոչընդոտում են Թուրքիայի ու Երեւանի միջեւ պաշտոնական հարաբերությունների կարգավորմանը։ Այս մասին NEWS.am-ի թղթակցի հետ զրույցում հայտարարեց ԱԺ «Ծառուկյան» խմբակցության քարտուղար Վահե Էնֆիաջյանը՝ պատասխանելով հարցին, թե կարո՞ղ են, արդյոք, հայ-թուրքական հարաբերությունների կարգավորման հարցում տեղաշարժի ինչ-որ նախադրյալներ ի հայտ գալ։
Նրա խոսքով՝ գլխավոր խոչընդոտն այդ գործընթացի նկատմամբ ադրբեջանական կողմի բացասական արձագանքն է։ «Ինչպես հիշում եք՝ Ցյուրիխում ստորագրված հայ-թուրքական արձանագրություններին ադրբեջանական կողմի արձագանքը նախադեպային էր: Չպետք է մոռանալ նաեւ Բաքվի արձագանքը Երեւան-Վան չվերթ բացելու ծրագրերին, որոնք այդպես էլ չիրականացան»,- հստակեցրեց Էնֆիաջյանը։
Խմբակցության պատգամավորի խոսքով՝ ակնհայտ է, որ Թուրքիայում ամբողջությամբ գիտակցում են, որ Բաքվում կոշտ ու տհաճ կարձագանքեն հայ-թուրքական սահմանի ապաշրջափակմանը։ Նա նաեւ հավելեց, որ թուրքական կողմը լավ հասկանում է, որ սահմանների բացումը կբերի սահմանային շրջանների տնտեսական զարգացմանը, երկրի մի քանի նահանգներում կյանքի մակարդակի բարձրացմանը, որոնք այս պահին շատ թույլ են զարգացած։ Սակայն, Վահե Էնֆիաջյանի կարծիքով, Թուրքիան գիտակցում է նաեւ իր շահը, որը կարող է ստանալ ադրբեջանական գազի մատակարարումներից, քանի որ Ռուսաստանից ու Իրանից հետո նրա գլխավոր ու էժան մատակարարը Ադրբեջանն է։
«Այս հանգամանքները եւ հավերժական հայ-թուրքական հարցը հաշվի առնելով՝ մոտ ապագայում հարաբերությունների կարգավորման իրական հեռանկարներ չեմ տեսնում»,- եզրափակեց «Ծառուկյան» խմբակցության քարտուղարը։
Հիշեցնենք, որ Հայաստանն ու Թուրքիան չունեն դիվանագիտական հարաբերություններ, իսկ հայ-թուրքական սահմանը փակվել է 1993 թվականին թուրքական կողմից նախաձեռնությամբ։ Երկու երկրների հարաբերությունների կարգավորման գործընթացը նախաձեռնվել է 2008 թվականի աշնանը Հայաստանի նախագահ Սերժ Սարգսյանի կոմից։ 2009 թվականի հոկտեմբերի 10-ին երկու երկրների արտաքին գործերի նախարարները Ցյուրիխում ստորագրել էին «Հայաստանի Հանրապետության եւ Թուրքիայի Հանրապետության միջեւ դիվանագիտական հարաբերություններ հաստատելու մասին» եւ «Հայաստանի Հանրապետության եւ Թուրքիայի Հանրապետության միջեւ հարաբերությունների զարգացման մասին» արձանագրությունները։ Սակայն ավելի ուշ Անկարան առաջ է քաշել ղարաբաղյան հակամարտության հետ կապված նախապայմաններ, որը բերել է հայ-թուրքական հարաբերությունների կարգավորման գործընթացի փաստացի տապալմանը։ Արձանագրությունների վավերացման հարցը սառեցված է։