Դեկտեմբերի 20-ից մինչեւ 2018-ի  հունվարի 15-ն արգելվել է Սեւանա լճում ձկան եւ խեցգետնի որսը:

Ղեկավարվելով «Կենդանական աշխարհի մասին» Հայաստանի Հանրապետության օրենքի 6-րդ հոդվածի «է)» կետով, Հայաստանի Հանրապետության կառավարության 2002 թվականի  օգոստոսի 8-ի  N 1237-Ն որոշման N1 հավելվածի 7-րդ կետի «ա)» ենթակետով եւ 12-րդ կետի «դ)»  ենթակետով, ինչպես նաեւ հիմք ընդունելով Հայաստանի Հանրապետության Գիտությունների Ազգային Ակադեմիայի կենդանաբանության եւ հիդրոէկոլոգիայի գիտական կենտրոնի 2017 թվականի դեկտեմբերի 8-ի N2459-191 գրությունը` սույն թվականի դեկտեմբերի 14-ին ՀՀ բնապահպանության նախարար Արծվիկ Մինասյանը ստորագրել է հրաման, որով արգելվել է  2017թ. դեկտեմբերի 20-ից մինչեւ 2018թ. հունվարի 15-ը Սեւանա լճում ձկան եւ խեցգետնի որսը, ինչպես նաեւ ուժեղացվել է հսկողությունն ապօրինի ձկնորսության եւ ձկնային պաշարների պահպանության ուղղությամբ:

Հրամանում ասված է.

«1. Իշխան եւ Սիգ ձկնատեսակների ձվադրման ժամանակահատվածում ձկների բնական վերարտադրությունն ապահովելու նպատակով 2017 թվականի դեկտեմբերի 20-ից մինչեւ 2018 թվականի հունվարի 15-ն ուժեղացնել վերահսկողությունը Սեւանա լճում ապօրինի ձկնորսության եւ ձկնային պաշարների պահպանության ուղղությամբ:

2.Հայաստանի Հանրապետության բնապահպանության նախարարության «Սեւան ազգային պարկ» պետական ոչ առեւտրային կազմակերպության տնօրենին`

 1) մինչեւ սույն թվականի դեկտեմբերի 19-ն ապահովել Սեւանա լճից ձկնորսության եւ խեցգետնորսության համար նախատեսված բոլոր որսագործիքների,  լողամիջոցների ինչպես նաեւ ժամանակավոր կացարանների դուրս բերումը,

 2) շրջիկ հսկողություն իրականացնել Սեւանա լճի առափնյա տարածքներում եւ գետաբերաններում,

 3) կազմակերպել ստուգայցեր Սեւանա լճի վրա` համագործակցելով Հայաստանի Հանրապետության բնապահպանության նախարարության բնապահպանության եւ ընդերքի տեսչական մարմնի, Հայաստանի Հանրապետության Գեղարքունիքի մարզային ոստիկանության, Հայաստանի Հանրապետության Գեղարքունիքի մարզպետարանի եւ համայնքների ղեկավարների հետ:

3. Հայաստանի Հանրապետության բնապահպանության նախարարության բնապահպանության եւ ընդերքի տեսչական մարմնին առաջարկել`

1) կազմակերպել ստուգայցեր Սեւանա լիճը գոտեւորող մայրուղիներում, քաղաքային շուկաներում, Սեւանա լիճ թափվող գետերի վրա,

2) ապահովել մասնակցությունը սույն հրամանի 2-րդ կետում նախատեսված աշխատանքներին»: