ՄԱԿ-ի իրավապաշտպանները կոչ են արել Իրանին չեղարկել Իրանի քաղաքացի եւ Շվեդիայի բնակիչ, Իսրայելի օգտին լրտեսության մեջ մեղադրվող Ահմադռեզա Ջալալիի մահապատիժը, հաղորդում է ՄԱԿ-ի ռադիոն։
Փորձագետների կարծիքով, նրա նկատմամբ դատաքննությունն ընթացել է կոպիտ խախտումներով։ Նա ձերբակալվել էր անցած տարվա ապրիլին Իրան այցելելիս։ Բժշկին թույլ չեն տվել շփվել արտաքին աշխարհի հետ, փաստաբան չեն տրամադրել, առանց մեղադրանք առաջադրելու պահել են երկու ամիս, կտտանքներով ստիպել են խոստովանել մեղքը։
Հոկտեմբերի 21-ին դատարանը նրան մահապատժի էր դատապարտել, իսկ Գերագույն դատարանը վճիռն անփոփոխ էր թողել։ Դեկտեմբերի 17-ին Իրանում հեռուստատեսությամբ ցուցադրել էին նրա ինքնախոստովանությունը, որը, ըստ փորձագետների, արվել է կտտանքների ազդեցությամբ։
Իրանի կառավարությունից հայտնել են, թե Ջալալիին թույլատրել են շփվել ընտանիքի անդամների հետ։