ՄԱԿ-ի Գլխավոր ասամբլեայում Երուսաղեմը որպես Իսրայելի մայրաքաղաք ճանաչման վերաբերյալ ԱՄՆ-ի դիրքորոշման դատապարտումը մեծ սխալ էր: Այս մասին դեկտեմբերի 28-ին լրագրողների հետ հանդիպման ժամանակ հայտարարել է ՀՀ արտակարգ եւ լիազոր դեսպան Արման Նավասարդյանը:
Նրա խոսքերով՝ այս դեպքում միակ ճիշտ որոշումը կլիներ հայկական կողմի՝ քվեարկությանը չմասնակցելը կամ մեր ներկայացուցչի ֆիզիկական բացակայությունը: «Դա կլիներ լավագույն լուծումը, եւ ոչ ոք դրա համար մեզնից չէր նեղանա եւ չէր դատապարտի: Ոչ ոք. ո՛չ մեր բարեկամները, ո՛չ մեր թշնամիները», - ասել է Նավասարդյանը` հավելելով, որ այս դիրքորոշումը չի կարող ազդել Հայաստանի եւ Իսրայելի հարաբերությունների վրա, որոնք իրականում նոր են սկսում ձեւավորվել:
Հիշեցնենք, որ ԱՄՆ նախագահ Դոնալդ Թրամփը դեկտեմբերի 6-ին հայտարարել էր Երուսաղեմը Իսրայելի մայրաքաղաք ճանաչելու որոշման մասին: Ի պատասխան այս որոշման՝ Պաղեստինը հրաժարվել է ճանաչել ԱՄՆ-ին որպես միջնորդ մերձարեւելյան խաղաղության գործընթացում:
Գլխավոր ասամբլեայի բանաձեւը անօրինական է հռչակում որեւէ որոշում, որը ենթադրում է Երուսաղեմի կարգավիճակի, ժողովրդագրական բնույթի կամ այլ կարեւոր պարամետրերի փոփոխություն:
Այսպիսով, Գլխավոր ասամբլեան անօրինական է ճանաչել ԱՄՆ-ի՝ Երուսաղեմի վերաբերյալ որոշումը: Բանաձեւին «կոմղ» քվեարկածների թվում էին նաեւ Հայաստանը եւ Ռուսաստանը: