Կոսովոյի ինքնահռչակ հանրապետության խորհրդարանի պատգամավոր եւ վարչապետ Ռամուշ Հարադինայի կրտսեր եղբայր Դաուտը սպառնացել է ակտիվացնել Կոսովոյի ազատագրման բանակի (ԿԱԲ) զինյալներին, երբ տարածաշրջանում սկսեն Միջազգային ռազմական տրիբունալի մեղադրանքներով ձերբակալությունները, հաղորդում է «ՌԻԱ Նովոստի»-ն:
Ավելի վաղ Կոսովոյի ինքնահռչակ հանրապետության նախագահ Հաշիմ Թաչին Կոսովոյում եւ Մետոհիայում հանցագործությունների համար Միջազգային հատուկ դատարանի ստեղծումը պատմական անարդարություն էր անվանել Պրիշտինայի եւ ԿԱԲ-ի վետերանների հանդեպ:
Պրիշտինայի ԶԼՄ-ները դեկտեմբերի վերջին հայտնել էին, որ ռազմական հանցագործությունների մեղադրանքներ շուտով կարող են առաջադրվել վարչապետի եղբայր Դաուտի եւ նախագահ Թաչիի հորեղբոր՝ Ազեմ Սուլիայի դեմ, որոնք ԿԱԲ-ի շարքերում գործունեության համար նախկինում տարբեր քրեական դատարանների առջեւ են կանգնել, սակայն ներկայումս ազատության մեջ են:
«ԿԱԲ-ի գործիքը Կոսովոյում կրկին կակտիվացվի, երբ հատուկ դատարանի որոշմամբ կսկսվեն ձերբակալումները: Ես չեմ ներկայացնում ռազմական թեւը, ես Կոսովոյի քաղաքացի եմ: Իմ ամենամեծ նվաճումը տարված պատերազմն էր, եւ ես միշտ պատրաստ եմ աջակցել իմ ընկերներին: ԿԱԲ-ը հանցանք չի գործել, միայն՝ Սերբիան», - Հարադինայ կրտսերի խոսքերը մեջբերում են Sitel հեռուստաալիքը եւ Պրիշտինայի մի շարք լրատվամիջոցներ: