«Սասնա ծռերի» անդամ, «Նուբարաշեն» ՔԿՀ-ում գտնվող Արմեն Բիլյանի մոտ դեկտեմբերի 21-ին Քրեակատարողական ծառայության բժշկական աշխատանքային հանձնաժողովի զննությամբ ախտորոշվել է «Հարմարվողականության խանգարում», եւ նշանակվել է դեղորայքային բուժում` «Նովոպասիտ» դեղամիջոցը:
ՀՀ ԱՆ ՔԿՎ հանրային կապերի բաժնից NEWS.am-ին հայտնում են, որ իրականությանը չեն համապատասխանում պնդումները, թե նա պատշաճ բուժօգնություն չի ստանում: Նրա համար լրացուցիչ հետազոտությունների, ինչպես նաեւ ստացիոնար բուժման կարիք չի արձանագրվել:
Կալանավարված անձ Ա. Բիլյանին, ինչպես նաեւ իր փաստաբանին բացատրվել է, որ Ա. Բիլյանը կարող է օգտվել ՀՀ կառավարության 26.05.2006թ.-ի թիվ 825-Ն որոշման 1-ին գլխի 9-րդ կետի ընձեռած հնարավորությունից, այն է` «Կալանավորված անձը եւ դատապարտյալն իրենց հաշվին եւ իրենց ընտրությամբ պետք է հնարավորություն ունենան օգտվել այլ բժիշկ-մասնագետների ծառայություններից»:
Ավելի վաղ NEWS.am-ը հայտնել էր, որ «Սասնա Ծռեր» խմբի աջակիցները շտապ հաղորդագրություն են տարածել, որում ասված է. «Նուբարաշեն ՔԿՀ-ում գտնվող երկու հացադուլավոր Սասնա Ծռերը՝ Արմեն Բիլյանը եւ Սմբատ Բարսեղյանը, պահվում են անմարդկային պայմաններում։
Նրանց մեկուսացրել են խոնավ, ցուրտ եւ չջեռուցվող խցերում, իսկ փաստաբանների դիմումին դեռ պատասխան չի տրվել ոչ ՔԿՀ-ի եւ ոչ էլ ՔԿՀ-ների վարչության կողմից։
Նշենք, որ Արմեն Բիլյանը ավելի քան 10 օր է, ինչ հացադուլի մեջ է: Արմեն Բիլյանը պահանջում է իրեն բժշկական հետազոտությունների ենթարկել, եւ բուժվել քաղաքացիական հիվանդանոցում, քանի որ ունի առողջական լուրջ խնդիրներ՝ կապված նյարդերի հետ։