Անվտանգության խորհուրդը չպետք է միջամտի Իրանի ներքին գործերին, ինչպես նաեւ չպետք է քննարկի երկրում մարդու իրավունքների ոլորտում տիրող իրավիճակը: Այս մասին ԱՄՆ-ի նախաձեռնությամբ Իրանում բողոքի ցույցերի հարցով հրավիրված Անվտանգության խորհրդի նիստի ժամանակ հայտարարել է ՄԱԿ-ում Չինաստանի մշտական ներկայացուցչի տեղակալ Ու Հայթաոն։
Նրա խոսքով՝ Չինաստանը «ուշադրություն է դարձնում» Իրանում տեղի ունեցող վերջին իրադարձություններին, ինչպես նաեւ «հույս ունի ու հավատում է, որ Իրանի կառավարության եւ ժողովրդի ջանքերի շնորհիվ Իրանը կշարունակի կայուն մնալ եւ զարգանալ»: «Իրանում իրավիճակը ոչ մի վտանգ չի ներկայացնում միջազգային խաղաղությանն ու անվտանգությանը, ինչպես նաեւ ընդգրկված չէ Անվտանգության խորհրդի օրակարգում»,- նշել է դիվանագետը:
Նա հիշեցրել է, որ ՄԱԿ-ի կանոնադրության համաձայն՝ Անվտանգության խորհրդի հիմնական պատասխանատվությունը միջազգային խաղաղության եւ անվտանգության պահպանումն է, ուստի Խորհուրդը չպետք է քննարկի որեւէ երկրի ներքին գործերին կամ որեւէ երկրում մարդու իրավունքների իրավիճակին վերաբերող հարցեր»: Հայթաոյի խոսքով՝ իրավիճակը Իրանում չի մտնում Խորհրդի պատասխանատվության շրջանակներում՝ ինչպես նշված է ՄԱԿ-ի կանոնադրության մեջ: Ավելին, նրա կարծիքով՝ ՄԱԿ-ի Անվտանգության խորհրդում այս թեմայի քննարկումը չի օգնի Իրանի ներքին գործերին վերաբերող հարցերի լուծմանը: