ԱՄՆ-ում Լրագրողների պաշտպանության կոմիտեն հայտարարել է մամուլի ազատության խախտման մրցանակ՝ ԱՄՆ նախագահ Դոնալդ Թրամփին հաղթող ճանաչելով «Համաշխարհային լրատվամիջոցների ազատության խախտման մեջ ընդհանուր վաստակ» անվանակարգում, փոխանցում է «ՌԻԱ Նովոստի»-ն:
Իրավապաշտպան կազմակերպությունն այսպես է պատասխանել Թրամփի որոշմանը տարվա «ամենապատվազուրկ եւ կոռումպացված» լրատվամիջոցներին պարգեւատրելու մասին:
«Միացյալ Նահանգները մամուլի ազատության մասին իր Առաջին ուղղմամբ վաղուց ի վեր ամբողջ աշխարհի անկախ լրատվամիջոցների համար ուղեցույց աստղ է: Այն դեպքում, երբ ԱՄՆ նախորդ նախագահները ինչ-որ չափով քննադատել են մամուլին, սակայն դրա հետ մեկտեղ հրապարակային պարտավորություն են ստանձնել ինչպես երկրում, այնպես էլ նրա սահմաններից դուրս ժողովրդավարության կարեւոր դերը պաշտպանելու համար: Թրամփը, հակառակը, հետեւողականորեն հանդես է եկել լրատվամիջոցների դեմ եւ հրաժարվել է հրապարակայնորեն բարձրացնել մամուլի ազատության հարցերը այնպիսի բռնակալ առաջնորդների հետ, ինչպիսին են Սին, Էրդողանը եւ Սիսին»,- նշված է կազմակերպության հաղորդագրության մեջ, որը բազավորված է Նյու Յորքում
Կոմիտեն հայտարարել է, որ «Չինաստանի, Սիրիայի եւ Ռուսաստանի իշխանությունները նվաճել են «ֆեյքային նորությունների» մակդիրը»:
«Թրամփի վարչակազմի օրոք արդարադատության նախարարությունը չկարողացավ հավատարիմ մնալ լրագրողների աղբյուրների պաշտպանության սկզբունքին, իսկ Պետքարտուղարությունն առաջարկեց կրճատել միջազգային կազմակերպությունների ֆինանսավորումը, որոնք օգնում են ամրապնդել մամուլի ազատությանն աջակցող միջազգային նորմերը»,- նշված է կոմիտեի հայտարարության մեջ:
Դրանից զատ, կոմիտեն հրապարակել է նաեւ այլ անվանակարգեր: Մասնավորապես՝ «ամենավիրավորվող առաջնորդ», եւ այս անվանակարգում հաղթող է դարձել Թուրքիայի նախագահ Ռեջեփ Թայիփ Էրդողանը, քանի որ «Թուրքիայի իշխանությունները բազմիցս լրագրողներին, լրատվամիջոցներին եւ համացանցի օգտատերերին մեղադրանքներ են ներկայացրել Էրդողանին վիրավորելու համար»: Այս անվանակարգի մեջ էր մտել նաեւ Դոնալդ Թրամփը:
Իրավապաշտպաններն Էրդողանին հաղթող են հայտարարել նաեւ «մամուլի դեմ ահաբեկչական օրենքների ամենազարհուրելի կիրառում» անվանակարգում: Կոմիտեն «լրատվամիջոցների ամենախիստ սահմանափակումներ» անվանակարգի մեջ է ներառել Չինաստանի եւ Ռուսաստանի առաջնորդներին, իսկ «մամուլի ազատության հարցում ամենախոշոր նահանջ» անվանակարգում հաղթել է Մյանմարի առաջնորդ Աուն Սան Սու Չժին, երկրորդ տեղը զբաղեցրել է Լեհաստանի նախագահ Անջեյ Դուդան: