Ղարաբաղյան հակամարտության գոտում եւ նրա կարգավորման մասով 2018 թվականից չպետք է ոչ մի առանձնահատուկ բան սպասել՝ ո՛չ դրական, ո՛չ բացասական իմաստով: Այս մասին հունվարի 9-ին լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Նրա համոզմամբ՝ Լեռնային Ղարաբաղի խնդրի բանակցային գործընթացում առաջնթացի համար հիմքեր չկան: Սակայն նոր պատերազմի սպասումներ էլ չպետք է ունենալ, չնայած այսուհետեւ եւս շփման գծում կրակոցներ կլինեն: Քաղաքագետը ամբողջությամբ չի բացառում Լեռնային Ղարաբաղում նոր լարվածության հնարավորությունը, սակայն լայնածավալ ռազմական գործողությունների վերսկսման հնարավորություններ չի տեսնում:
Իսկանդարյանը նշեց, որ 2018-ին չարժի սպասել ղարաբաղյան խնդրի վերջնական կարգավորում, քանի որ դրա համար ոչ մի նախադրյալ չկա: Դրա հետ մեկտեղ փորձագետն ընդգծեց, որ ԵԱՀԿ Մինսկի խմբի համանախագահները արդեն վաղուց են հրաժարվել այս հակամարտության կարգավորման փորձերից եւ զբաղվում են միայն նրա անմիջական մենեջմենթով՝ փորձելով նվազեցնել սահմանին հակամարտող կողմերի միջեւ լարվածության մակարդակը եւ փոխվստահության մթնոլորտ ստեղծել:
