Ճապոնական Nissan, Mitsubishi ավտոկոնցեռների եւ ֆրանսիական Renault ընկերության դաշինքը հայտարարել է ավտոշինության ոլորտում տեխնոլոգիաների զարգացման նպատակով 1 մլրդ դոլար ծավալով վենչուրային ֆոնդ ստեղծելու մասին։ Այս մասին նշված է հունվարի 10-ին նրանց տարածած հայտարարության մեջ, փոխանցում է ՏԱՍՍ-ը։
«Մեր նորարարական մոտեցումը թույլ կտա համագործակցել տեխնոլոգիական ստարթափերի եւ ձենարկությունների հետ, ինչպես նաեւ ներդրումներ կատարել նրանցում, իսկ նրանք, իրենց հերթին, կարող են օգտվել մեր համաշխարհային դաշինքի փոխգործակցությունից»,-նշել է դաշինքի տնօրենների խորհրդի նախագահ Կարլոս Գոնը։
Նշվում է, որ ֆոնդի հիմնական խնդիրն է լինելու անօդաչու կառավարման տեխնոլոգիաների եւ անվտանգության համակարգերի զարգացման սատարումը, այդ թվում՝ արհեստական ինտելեկտի օգտագործմամաբ։ Ֆոնդի գործողության ժամկետը 5 տարի է։ 2018 թվականին ներդրումների վրա նախատեսվում է ծախսել շուրջ 200 մլն դոլար, ներդրումների համար առաջին ընկերությունը կդառնա Ionic Materials ամերիկյան ընկերությունը, որը զբաղվում է մարտկոցների լիցքավորիչների մասերի պատրաստմամբ։
Ֆոնդի ֆինանսավորումը կիրականացվի դաշինքի մեջ ընդգրկված ընկերությունների կողմից, դրանց թվում՝ Nissan-ի եւ Renault-ի կողմից կֆինանսավորվի ֆոնդի 40 տոկոսը, Mitsubishi-ինը՝ 20 տոկոսը։
Ճապոնա-ֆրանսիական դաշինքը առաջատարն է աշխարհում։ Այն արտադրում է ավելի քան 10 մլն մեքենաներ ամեն տարի եւ զբաղեցնում է երրորդ տեղը աշխարհում մեքենաների վաճառքի կտրվածքով՝ գերմանական Volkswagen ու ճապոնական Toyota ընկերություններից հետո։
