Պակիստանում 8-ամյա մի աղջկա բռնաբարության եւ սպանության պատճառով կատաղած ամբոխը հարձակվել է ոստիկանության բաժանմունքի եւ մոտակա կառավարության շենքի վրա: Միջադեպը տեղի է ունեցել արեւմտյան Փենջաբ նահանգում: Բախումների հետեւանքով առնվազն երկու մարդ է զոհվել, մի քանիսը վիրավորվել են, հաղորդում է AP-ն:
Բախումները տեղի են ունեցել Կասուր քաղաքում 8-ամյա Զայնաբ Անսարիի հուղարկավորությունից մի քանի ժամ առաջ, որի դեպքը համընդհանուր վրդովմունքի պատճառ է դարձել։
Անցյալ շաբաթ հարեւանի տան ճանապարհին աղջիկն անհետացել է։ Նրա մարմինը հայտնաբերվել էր նախօրեին աղբամանի մեջ: Ոստիկանությունը հայտնել է, որ երեխան բռնաբարվել եւ սպանվել է: Ոստիկանության տվյալներով՝ վերջին մի քանի ամիսներին քաղաքում ավելացել են սեռական բռնության դեպքերը, եւ իրավապահ մարմինները փորձում են հասկանալ `արդյոք այդ միջադեպերը կապված են իրար հետ:
Սոցիալական ցանցերում օգտատերեր դատապարտել են կառավարությանը հանցագործության մեջ ներգրավված անձանց չձերբակալելու համար:
Հունվարի 10-ի բախումների ընթացքում ոստիկանները կրակ են բացել ցուցարարների վրա:
Լահորի Գերագույն դատարանի գլխավոր դատավորը հանձնարարել է Զայնաբի սպանության գործով հետաքննություն իրականացնել: Արդարադատության նահանգային նախարար Ռանա Սանաուլան ասել է, որ ոստիկանությունը փորձում է զսպել բռնությունը, գտնել եւ ձերբակալել բոլոր նրանց, ովքեր մեղավոր են աղջկա սպանության մեջ։
Քաղաքի խանութների սեփականատերերն որոշել են փակել դրանք՝ ի նշան իրենց զայրույթի:
Տեղի հոգեւորական Թահիր ուլ Քադրին, որը մասնակցել էր Զայնաբի հուղարկավորությանը, պահանջել էր, որ տեղի իշխանությունները հրաժարական տան՝ ասելով, որ նրանք իրավունք չունեն իշխանության ղեկին մնալ Զայնաբի սպանությունից հետո:
Հազարավոր սգացողների առաջ հանդես գալով՝ նա մեղադրել է Փենջաբի գլխավոր նախարար Շահբազ Շարիֆին այն բանում, որ չի կարողացել նահանգում պաշտպանել անմեղ աղջկա կյանքն ու հեղինակությունը։