Եվրախորհրդարանի անդամ, Բելգիայի ներկայացուցիչ Լուի Միշելը երկու գրավոր հարց է ուղղել ԵՄ գերագույն ներկայացուցիչ Ֆեդերիկա Մոգերինիին Արցախի ուսանողների վրա Erasmus+ ծրագրի տարածման, նաեւ շփման գծում միջադեպերի հետաքննության մեխանիզմի իրականացման մասին։ Այս մասին հայտնում է Եվրոպայում Հայ դատի հանձնախմբի գրասենյակը։
Նամակում Միշելը նշում է, որ Արցախի ուսանողների համար անհասանելի է ծրագիրը , որը տարածվում է Արեւելյան գործընկերության վեց անդամ երկրների վրա։
«Արցախի ներկա կարգավիճակը ոչ մի դեպքում չպետք է արդարացում լինի Արցախի ժողովրդի սոցիալական մեկուսացման համար, հատկապես ուսանողների ու երիտասարդների։ Քանի որ վերջնական նպատակը տարածաշրջանի խաղաղությունն է, Լեռնային Ղարաբաղի երիտասարդությունը պետք է օգտվի այն նույն իրավունքներից, ինչ Արեւելյան գործընկերության մյուս վեց երկրների երիտասարդությունը։ Այս կապակցությամբ գրավոր հարցը կարեւոր քայլ է հասարակայնության ուշադրությունը գրավելու ու այս կարեւոր հարցը ԵՄ-ում որոշում կայացնող անձանց առջեւ բարձրացնելու համար»,- հայտնել է Հայ դատի հանձնախմբի ներկայացուցիչ Կասպար Կարապետյանը։
Լուի Միշելը նաեւ դիմել է Մոգերինիին ՝ խնդրելով պարզաբանել, թե ինչպես է ԵՄ-ն մտադիր աջակցել հրադաարի ռեժիմի պահպանմանը ու հետաքննության մեխանիզմի ստեղծմանը։
