Պերմի թիվ 127 դպրոցի աշակերտների եւ ուսուցիչների վրա հարձակում կատարած երկու անհայտ անձինք ձերբակալվել են, հայտնել են շրջանի տարածքային անվտանգության նախարարությունում:
Գերատեսչության հաղորդմամբ` ժամը 10:19-ին ահազանգ է ստացվել այն մասին, որ Պերմի թիվ 127 դպրոցում դիմակավորված երկու անհայտ անձ հարձակվել են ուսուցչի եւ աշակերտների վրա: «11:15-ի դրությամբ դպրոցում 743 մարդ է եղել, որից 698-ը՝ երեխաներ, 45-ը` մեծահասակ: Այժմ բոլորը տարհանվել են: Միջադեպի հետեւանքով 9 մարդ վիրավորվել է, այդ թվում` 8 երեխա եւ 1 ուսուցիչ», - նշվում է հաղորդագրության մեջ:
Ըստ տեղական ԶԼՄ-ների, որոնց թղթակիցները շփվել են դպրոցի աշակերտների հետ, հրդեհային ահազանգից հետո ուսուցիչները սկսել են դասարաններից դուրս բերել աշակերտներին, ընդ որում, դպրոցի երրորդ հարկի պատուհանից ծուխ էր դուրս գալիս: Իսկ ուսանողներից մեկի հայրը պատմել է, որ իր կնոջը դպրոցում տեղեկացրել են, որ «39-րդ կաբինետում երկու հոգի դանակներով հարձակվել են քիմիայի ուսուցչի եւ աշակերտների վրա, ընդ որում, հարվածները հասցվել են հիմնականում պարանոցի հատվածում»: