Միացյալ Նահանգները փաստացիորեն չի նպաստում սիրիական հակամարտության կարգավորմանը, սակայն փորձում է օգնել նրանց, ովքեր ցանկանում են Դամասկոսում ռեժիմը փոխել: Այս մասին հայտարարել է Ռուսաստանի արտաքին գործերի նախարար Սերգեյ Լավրովը, հաղորդում է «ՌԻԱ Նովոստի»-ն:
«Օբամայի եւ Թրամփի վարչակազմերի միջեւ արմատական տարբերություն, հնարավոր է, չկա: Ցավոք, երկու դեպքում էլ մենք տեսնում ենք, որ նրանք ձգտում են օգնել ոչ թե հակամարտության արագ կարգավորմանը, այլ օգնում են նրանց, ովքեր ցանկանում են գործնական քայլեր իրականացնել Սիրիայում ռեժիմի փոփոխության համար»,-ասել է նա մամուլի ասուլիսի ժամանակ:
Սիրիայում զինված հակամարտությունը շարունակվում է 2011 թ. մարտից ի վեր: Կարգավորման շուրջ բանակցությունները տեղի են ունենում Ժնեւի եւ Աստանայի հարթակներում: Ավելի վաղ ՌԴ նախագահի հատուկ բանագնաց Ալեքսանդր Լավրենտիեւը հայտարարել էր, որ ՄԱԿ-ի Գլխավոր քարտուղարի հատուկ բանագնաց Ստեֆան դե Միստուրան մտադիր է հունվարի 21-ին Ժնեւում անցկացնել բանակցությունների 9-րդ փուլը:
Արեւմտյան երկրները պնդում են Սիրիայի նախագահ Բաշար Ասադի հրաժարականի շուրջ, իսկ Ռուսաստանը բազմիցս հայտարարել է, որ գործող նախագահի ճակատագիրը պետք է որոշի միայն Սիրիայի ժողովուրդը: