Անցյալ տարին բավականին արդյունավետ էր Հայաստանի Գիտությունների ազգային ակադեմիայի (ԳԱԱ) Պատմության ինստիտուտի գործունեության համար: Այս մասին հունվարի 16-ին լրագրողների հետ հանդիպման ժամանակ հայտարարեց ԳԱԱ պատմության ինստիտուտի տնօրեն Աշոտ Մելքոնյանը:
Նրա խոսքերով` չնայած սահմանափակ ռեսուրսներին` իրենք շարունակում են աշխատել եւ նոր դրական արդյունքներ գրանցել: «Բավական է նշել, որ նախորդ տարի մենք 257 աշխատանք ենք հրապարակել, որոնց 47 տոկոսը արդեն թարգմանվել եւ լույս է տեսել օտար լեզուներով, քանի որ դա շատ կարեւոր է»,- բացատրեց Մելքոնյանը` հավելելով, որ ինստիտուտի հիմնական գործունեությունը Հայաստանի պատմության փուլերի ուսումնասիրությունն ու համապատասխան նյութերի հրապարակումն է:
Աշոտ Մելքոնյանի խոսքով՝ արդեն 5 գիրք է հրապարակվել, այդ թվում նաեւ՝ ղարաբաղյան շարժմանը նվիրված: Ընդ որում, ինչպես նշեց պատմաբանը, առաջիկա ամիսներին նախատեսվում է այս թեմայով գիտակաժողովներ անցկացնել, որոնց մի շարք փորձագետներ են հրավիրվել աշխարհի տարբեր երկրներից, եւ շատերն արդեն տվել են իրենց համաձայնությունը: