Դոնի Ռոստովում գազի պայթյունի ալիքային հարվածի հետեւանքով վնասվել են բազմաբնակարան շենքի 3 տասնյակ բնակարանների դռները, «Ինտերֆաքսին» հայտնել է շրջանի դատախազության պաշտոնական ներկայացուցիչ Օքսանա Սուխարեւան:
«Նախնական տեղեկություններով՝ հարվածային ալիքը պոկել է 33 բնակարանի դռները, վնասվել է վերլեկահորը եւ տուժողի բնակարանը, որը պայթյունի հետեւանքով մահացել է պատահարի վայրում: Նա հաշմանդամ էր»,- հայտնել է Սուխարեւան:
Նրա խոսքով՝ փաստի ստուգմամբ զբաղվում է Դոնի Ռոստովի Վորոշիլովի շրջանի քննչական բաժինը, որի ընթացքն ու արդյունքները դատախազության վերահսկողության ներքո են:
Ռոստովի մարզի Արտակարգ իրավիճակների ծառայության գլխավոր վարչությունից գոծակալությանը հայտնել են, որ շենքից բնակիչների տարհանման համար նախապատրաստվել է ժամանակավոր տեղավորման երկու կետ №56 եւ №90 միջնակարգ դպրոցների բազայի վրա:
Ավելի վաղ հաղորդվել էր, որ Դոնի Ռոստովում չորեքշաբթի առավոտյան 10-հարկանի շենքում գազի պայթյունի եւ դրան հետեւած հրդեհի հետեւանքով տղամարդ է զոհվել:
Շենքից 50 մարդ է տարհանվել, այդ թվում՝ 15 երեխա: Շենքում առաջինից 9-րդ հարկերի պատուհանները կոտրվել են, վնասվել են նաեւ վերելակի դռները: Ներկայումս շենքի գազամատակարարումն անջատված է: