Համաշխարհային բանկի խմբի խորհրդատվական ծրագիրն օգնել է Հայաստանի տնտեսվարող սուբյեկտներին մինչեւ 20 միլիոն դոլար խնայել՝ տեսչական ստուգումների վրա ծախսվող ժամանակի եւ գումարների առումով, եւ խթանել է երկրի գործարարության միջավայրի բարելավումը:
Հայաստանի ներդրումային միջավայրի բարեփոխման ծրագիրը խորհրդատվական աջակցություն է տրամադրել ՀՀ կառավարությանը՝ ռիսկի վրա հիմնված տեսչական ստուգումների համակարգը բարելավելու մասով, ինչի արդյունքում կրճատվել է ռիսկայնության ցածր աստիճան ունեցող տնտեսվարող սուբյեկտների մոտ կատարվող տեսչական ստուգումների թիվը`միաժամանակ պահպանելով գործընթացի ապահոված պաշտպանվածությունը: Ծրագիրը նաեւ օժանդակել է տեսչական մարմնի օպտիմալացմանը՝ վերացնելով կրկնվող գործառույթները եւ ապահովելով ավելի լավ կառավարում:
Բարելավումների մասին է վկայում նաեւ 2017թ.-ի հուլիսից սեպտեմբեր ամիսների ընթացքում 600 տնտեսվարող սուբյեկտների շրջանում անցկացված հարցումը: Հարցվածների վաթսունչորս տոկոսը նշել է, որ վերջին երեք տարիներին տեսչական ստուգումների համակարգը բարելավվել է, միեւնույն ժամանակ հարցվածների գերակշռող մեծամասնությունը՝ 76%-ը, գտնում է, որ տեսչական ստուգումներն արդար են եղել: Վաթսուն տոկոսը նշել է, որ տեսչական ստուգումների բեռը նվազել է, եւ վաթսունհինգ տոկոսը համարել է, որ այժմ ավելի հեշտ է ստուգել տեսչական ստուգումների կանոնները: Հարցվածների ավելի քան կեսը հայտնել է, որ կրճատվել է տեսչական ստուգումների տեւողությունը:
«Բարենպաստ ներդրումային միջավայրը խիստ կարեւոր է մասնավոր հատվածի աճի համար եւ աշխատատեղերի ստեղծման ու տնտեսական աճի գլխավոր լծակն է», - նշել է Միջազգային ֆինանսական կորպորացիայի (IFC) Հարավային Կովկասի տարածաշրջանային տնօրեն Յան Վան Բիլսենը: «Տեսչական համակարգի նկատմամբ հավատն ու վստահությունը բարելավված ներդրումային միջավայրի նախադրյալներից են, այնպես որ մենք ուրախ ենք տեսնել Հայաստանի առաջընթացն այս ուղղությամբ»:
Ծրագրի շրջանակներում իրականացվել են վերապատրաստման ծրագրեր` նպատակ ունենալով նպաստել արհեստավարժության բարելավմանը եւ հնարավորություն տալ տեսուչներին՝ ոչ թե պատժել տնտեսվարող սուբյեկտներին կանոնները չկատարելու համար, այլ ուղղորդել նրանց առ այն, թե ինչպես կատարել այդ կանոնների պահանջները: Ծրագրով իրականացվել են նաեւ հանրության իրազեկման միջոցառումներ, որպեսզի ձեռնարկատերերը հնարավորություն ունենան իրենց կարծիքը հայտնել տեսչական գործընթացի մասին:
Հայաստանի ներդրումային միջավայրի բարելավման եռամյա ծրագիրը, որի ավարտը նախատեսված է
2018թ.-ի մարտին, իրականացվում է IFC-ի կողմից, որը Համաշխարհային բանկի քույր կազմակերպություն է եւ Համաշխարհային բանկի խմբի անդամ: Ծրագիրն իրականացվել է Ավստրիայի ֆինանսների դաշնային նախարարության եւ Հունգարիայի գործընկերային ֆինանսավորման/Հունգարիայի EXIM բանկի կողմից:
Հայաստանն IFC-ին անդամակցել է 1995 թվականին: Այդ պահից սկսած IFC-ն ավելի քան 480 միլիոն դոլար է տրամադրել, այդ թվում՝ գրեթե 118 միլիոն դոլար է մոբիլիզացրել այլ փոխառուներից՝ մի շարք ոլորտներում 49 ծրագրերի ֆինանսավորման համար. այդ ոլորտներից են ֆինանսական շուկաները, արդյունաբերությունը, ագրոբիզնեսը, ծառայությունները եւ հանքարդյունաբերությունը: Բացի այդ, IFC- ն իր առեւտրի ֆինանսավորման ծրագրի միջոցով աջակցել է նաեւ ավելի քան 130 միլիոն դոլարի արժողությամբ առեւտրային գործարքների եւ իրականցրել է մասնավոր հատվածի զարգացմանն ուղղված խորհրդատվական ծրագրեր:
