Արցախի Արտաքին գործերի նախարարությունը ողջունում է ամերիկացի կոնգրեսմեն Ֆրենկ Փալոնեի «ԱՄՆ-Արցախ. այցելություններ եւ շփումներ» նախաձեռնությունը: Այս մասին NEWS.am-ին ասել է Արցախի ԱԳՆ մամուլի քարտուղար Անի Սարգսյանը:
«Ողջունում ենք կոնգրեսմեն Ֆրենկ Փալոնեի օրինագիծը, որն ուղղված է Արցախի եւ ԱՄՆ միջեւ կապերի հաստատմանը եւ ԱՄՆ պաշտոնատար անձանց՝ Արցախ այցելության հարցում առկա արհեստական խոչընդոտների վերացմանը։ Համոզված ենք, որ երկու պետությունների պաշտոնական ներկայացուցիչների փոխադարձ այցելությունները, մեր երկրների միջեւ ուղղակի եւ բաց երկխոսության հաստատումը կնպաստեն տարածաշրջանում գոյություն ունեցող խնդիրների լուծմանը։ Միջազգային համագործակցությունը՝ հիմնված ներգրավման, այլ ոչ բացառման սկզբունքի վրա, նույնպես տարածաշրջանում լարվածության թուլացման կարեւոր գործոններից մեկն է»,- ասաց նա:
Անի Սարգսյանը նշեց, որ իրենք ակնկալում են՝ կոնգրեսական Փալոնեի նախաձեռնությունը լայն աջակցություն կգտնի ԱՄՆ Կոնգրեսում եւ նոր ազդակ կհաղորդի Արցախի եւ ԱՄՆ-ի միջեւ հարաբերությունների զարգացմանը։
