Հաշվարկները ցույց են տվել, որ հունվարի 1-ին Հայաստանում թանկացումները համահունչ են Հարկային օրենսգրքով նախատեսված ակցիզային դրույքաչափերի բարձրացմանը, այսինքն սպեկուլյատիվ թանկացում չկա: Այս մասին NEWS.am-ի հետ զրույցում նշել է Հայաստանի գործատուների հանրապետական միության նախագահ Գագիկ Մակարյանը:
Դիտարկմանը, թե բենզինի, դիզվառելիքի ու գազի վաճառքով զբաղվող ընկերությունները միանգամից հունվարի 1-ից բարձրացրին գները, թեեւ իրենց ունեցած վառելիքի պաշարները նրանք ձեռք էին բերել նախորդ տարի՝ էժան գներով, Մակարյանն ասաց. «Քանի որ այդ պաշարները վաճառելուց հետո նրանք պետք է նոր քանակներ գնեն արդեն բարձր գնով, դրա համար փորձել են նախապես բարձրացնել գները, որպեսզի գումար հավաքվի նոր խմբաքանակը բարձր գնով գնելու համար: Ասենք, դուք ունեք 3 խնձոր, որը 300 դրամով եք վաճառում, բայց պետք է գնեք 10 խնձոր արդեն 500 դրամով: Հետեւաբար, այդ 200 դրամի պակասը կամ սեփական գրպանից եք դնելու, կամ վարկ վերցնեք: Որպեսզի այդպես չլինի, նրանք արդեն հիմա փորձում են խնձորը 500 դրամով վաճառել: Տրամաբանությունը սա է»:
Ըստ Մակարյանի, բենզինի թանկացումն այնքան կարեւոր չէ, որքան գազի, ինչպես նաեւ կերոսինի թանկացումը, որը շատ կարեւոր է հասարակության համար. «Մենք անպայման այդ աղմուկը ավելի սուր կլսենք: Գազի թանկացման հետեւանքով արդեն երթուղային տաքսիները, նաեւ սովորական տաքսիների տերերը բողոքում են: Տաքսի ծառայություններում, օրինակ, մեկ մեքենայի հաշվարկով օրական 1000-1200 դրամ ավելի վճարում պետք է արվի երկու անգամ լիցքավորելու դեպքում: Այսինքն ամսվա կտրվածքով նվազագույնը 30 հազար դրամ մեկ ավտոմեքենայի հաշվարկով ավել գումար պետք է դուրս գա: Հիմա կամ տաքսի ծառայությունն ինքը պետք է վճարի, կամ թողնի վարորդի վրա: Դա էլ նշանակում է, որ վարորդի օրական եկամուտն է այդ չափով նվազելու, ու սա այն դեպքում՝, նրանք առանց այդ էլ սահմանափակ եկամուտներ ունեն»:
Հարցին, թե ի վերջո, կբարձրանա՞ն տրանսպորտի ու տաքսու ուղեվարձերը, թե ոչ, Գագիկ Մակարյանն արձագանքեց. «Մենք ֆինանսների նախարարությունում այդ հարցը քննարկել ենք եւ կարծում եմ, որ կամ տրանսպորտը պետք է թանկանա, կամ համայնքները պետք է փորձեն սուբսիդավորել, որը դժվար կլինի: Պետությունը նման ծավալով սուբսիդավորում իրականացնելու հնարավորություն չունի, հետեւաբար ուրիշ մեխանիզմներ պետք է գտնել: Ավտոբուսներով եւ միկրոավտոբուսներով ծառայություն մատուցող սերվիսների համար հաստատագրված վճարը դարձել է արտոնագրային վճար: Բոլոր դեպքերում գործակիցը, որ հաշվարկվում է, կարող է անգամ Երեւանի գնի համեմատ թանկ ստացվել մարզերում: Եկող շաբաթ նորից ենք քննարկելու: Եթե տեսնենք, որ արտոնագրային վճարի չափն այսօրվա դրությամբ բարձր է, պետք է մտածենք այն իջեցնելու մասին: Սա լուծումներից մեկը կարող է լինել, որպեսզի ուղեւորափոխադրողները տոմսերը չթանկացնեն»:
