Արդեն մեկ տարի է անցել, ինչ կառավարական ուժերն ազատագրել են ապստամբներից սիրիական Հալեպ քաղաքի մեծ մասը: Սակայն հայտնի հին շուկան դեռ ավերված է: Առեւտրականների մի փոքր խումբ վերսկսել է աշխատանքը: Սա հույս է ներշնչում, որ երբեմնի բանուկ շուկան կդառնա այնպիսին, ինչպիսին նախկինում էր, հաղորդում է NTDTV- ն:
«Մենք վերադարձել ենք եւ խանութ բացել, բայց ինչ վերաբերվում է առեւտրին, ապա ոչ ոք չի գալիս, եւ դա խնդիր է: Գնորդները կգան, երբ անվտանգ լինի: Բացվել է երեք-չորս շարք: Էլեկտրականություն եւ ջուր դեռ չկա»,- պատմել է տեքստիլ խանութի տերը՝ Մահմուդ Միմեհը:
Հալեպի այս շուկան աշխարհի ամենահին փակ շուկան է համարվում: Ժամանակին այն տարածաշրջանային առեւտրի կենտրոնն էր: Քաղաքացիական պատերազմի հետ ամեն ինչ փոխվեց:
«Սա հին շուկա է: Այն Սիրիայի միջազգային առեւտրի կենտրոնն էր: Եվրոպայում եւ ամբողջ աշխարհում գիտեն Հալեպի ալ Գումրուկ շուկան»,- պատմել է շուկային տեքստիլ խանութներից մեկի տերը՝ Ալի Մոհազը:
Վաճառականներն ամբողջ աշխարհից գալիս էին այստեղ գործվածք, հագուստ, օծանելիք, համեմունքներ եւ հուշանվերներ գնելու համար: Շուկան ընդգրկված է ՅՈՒՆԵՍԿՕ-ի համաշխարհային ժառանգության ցուցակում: Նրա տարածքում գտնվում XIII դարի ամրոցը եւ հսկայական մզկիթը: Այս ամենը մասամբ կամ ամբողջությամբ ոչնչացվել է, իսկ վերականգնումը միլիոնավոր դոլարներ կարժենա, նշում է NTDTV-ն:
