Հայաստանի նախագահ Սերժ Սարգսյանը ԵԽԽՎ ադրբեջանական պատվիրակության ղեկավար Սամեդ Սեիդովին խորհուրդ է տվել հանգստանալ եւ իր բառերը չխեղաթյուրել:
Պատասխանելով Սեիդովի հարցին՝ Հայաստանի նախագահը նշել է, որ ինքը ռազմական առաջնորդ չի եղել, այլ Ղարաբաղի իրավունքների համար արդարացի պայքարի մասնակից: Հայաստանի նախագահը պարզաբանել է, որ իր ելույթում, այսպես կոչված, «Խոջալուի ցեղասպանության» մասին չի հիշատակել հասկանալի պատճառով. Խոջալուի իրադարձություններից անմիջապես հետո այդ ժամանակ Ադրբեջանի նախագահ Այազ Մութալիբովը մանրամասն պատմել է, թե ով է հատկապես սպանությունները կազմակերպել: «Ես շատ եմ ցավում: Ցեղասպանություն վերապրելը տառապանք է: Սակայն Ադրբեջանում, կարծես, միտում է նկատվում՝ նրանք պետք է ունենան այն ամենը, ինչ հայերն ունեն: Ինչու ցեղասպանություն անվանել այն, ինչը ցեղասպանություն չի եղել, եւ առավել եւս՝ Հայաստանի կողմից չի կատարվել»,- ասել է Սարգսյանը:
Ինչ վերաբերում է միջազգային պարտավորությունների չկատարմանը, ապա չկա մի որոշում, որը Հայատանը կժխտեր: Սարգսյանը ադրբեջանցի պատվիրակին խորհուրդ է տվել հարցն ավելի մանրամասն ուսումնասիրել: «1992 թվականին ՄԱԿ Անվտանգության խորհուրդը 4 բանաձեւ է ընդունել Լեռնային Ղարաբաղում ռազմական գործողությունների դադարեցման մասին»,- հիշեցրել է նախագահը՝ հավելելով, որ յուրաքանչյուր բանաձեւից հետո Ադրբեջանը ռազմական գործողությունները շարունակել է: Նրա խոսքով՝ հենց Ադրբեջանն է պատասխանատու ռազմական գործողությունների չդադարեցման համար: «Իսկ արդեն 1994 թվականին հրադադարի մասին համաձայնագիր է ստորագրվել միանգամայն այլ գործոնների ազդեցությամբ, այլ ոչ թե ՄԱԿ ԱԽ բանաձեւերի»,- շեշտել է Հայաստանի նախագահը:
«Դուք անհնարին բան եք ուզում: Դուք ցանկանում եք Ղարաբաղը վերադարձնել Ադրբեջանին: Ադրբեջանում հակահայկական հռետորաբանությունը այնքան տարածված է, որ դուք բացահայտորեն հայտարարում եք՝ ձեզ առանց հայերի Ղարաբաղ է պետք: Դա անհնար է: Դա երբեք չի լինի: Ղարաբաղի ժողովրդի պայքարի էությունը շատ հստակ է. դա պայքար է ազատության, ինքնորոշման համար, եւ այդպիսի պայքարը չի կարող դրական վերջ չունենալ»,- եզրափակել է Սերժ Սարգսյանը:
Նշենք, որ Ադրբեջանի վեց պատվիրակներ մի քանի վայրկյանում հայտարարեցին, որ մտադիր են հարցեր ուղղել Հայաստանի նախագահին, ինչի մասին վկայում է ԵԽԽՎ կայքում ներկայացված ցուցակը: Սակայն ժամանակի սղության պատճառով հարց ուղղել հաջողվեց միայն պատվիրակության ղեկավարին: