Բրիտանական BBC 3 ռադիոկայանը Մուսա լեռան դիմադրությանը նվիրված հատուկ ռեպորտաժ է պատրաստել, որտեղ անդրադաձ կա ավստրիացի հայտի գրող եւ դրամատուրգ Ֆրանց Վերֆելի «Մուսա լեռան 40 օրը» գրքի էկրանավորման հնարավորությանը:
Նշվում է, որ 1933 թվականին հրատարակված Ֆրանց Վերֆելի «Մուսա լեռան 40 օրը» վեպը մեծ հաջողություն ունեցավ, որը պատմում է 1915 թվականին Մուսա լեռան շրջակայքի հայկական գյուղերի «պարտիզանական բանակի» անձնուրաց պայքարի մասին՝ ընդդեմ թուրքական կանոնավոր զորքերի:
«Այդ ժամանակահատվածում եւ 1919 թվականից հետո ավելի քան մեկ մլն մարդկանց զանգվածային սպանությունները թուրքական ժխտողականության արշավի սկիզբ դրեցին: Օսմանյան Կայսրության դաշնակից Գերմանիան նույնպես ամեն կերպ ժխտում էր իր առնչությունը հայերի կոտորածներին, սակայն Գերմանիայում 1921 թվականին հայերի կոտորածների հիմնական կազմակերպիչներից Թուրքիայի ՆԳՆ նախկին նախարար Թալեաթ փաշայի սպանությունը ֆուրոր առաջացրեց: Հետագա դատաքննությունը խոշոր իրադարձություն էր լրատվամիջոցների համար եւ բացահայտեց Գերմանիայի կառավարության առնչությունն ու իմացությունը հայերի զանգվածային սպանությունների գործում: Հայերի ճակատագիրը քննարկվում էր այդ ժամանակ եւ շատերը դա համեմատում էին հրեաներին հարցի հետ»,-գրել է BBC 3-ը:
Հաղորդման հեղինակ հեղինակ Մարիա Մարգարոնիսը նաեւ նշում է, որ Վերֆելի գիրքը բազմիցս հայտնվել է արգելվածների շարքում, սակայն այն թարգմանվել է աշխարհի 34 լեզուներով: Նշվում է, որ Հոլիվուդում փորձեր են արվել ֆիլմ նկարահանել Ֆրանց Վերֆելի գրքի հիման վրա, սակայն դա իրականություն չի դարձել Թուրքիայի կառավարության ջանքերի հետեւանքով, որն ամեն կերպ ձախողել է նման ձեռնարկները: