Ժիրայր Սեֆիլյանի եւ մյուսների գործով դատական նիստին այսօր` փետրվարի 2-ին, Երեւան քաղաքի ընդհանուր իրավասության դատարանի Շենգավիթ վարչական շրջանի նստավայրում պաշտպանական կողմը միջնորդություն ներկայացրեց «Սասնա ծռեր» խմբի մի քանի անդամի որպես վկա հարցաքննելու մասին: Ամբաստանյալներից Ժիրայր Սեֆիլյանի շահերի պաշտպան Տիգրան Հայրապետյանը նշեց, որ պաշտպանական կողմը ցանկանում է որպես վկաներ հարցաքննել այն անձանց, որոնք Ժիրայր Սեֆիլյանի հետ մարտական ուղի են անցել, ծանոթ են Ժիրայր Սեֆիլյանի քաղաքական գործունեությանը: Ըստ այդմ` նրանք միջնորդեցին որպես վկա դատարան հրավիրել «Հիմնադիր խորհրդարանի» անդամներ Հասմիկ Էվոյանին եւ Ագապի Սահակյանին, «Սասնա ծռեր» խմբի անդամներ Աշոտ Պետրոսյանին, Գագիկ Եղիազարյանին, Կարո Եղնուկյանին, Սեդրակ Նազարյանին եւ Քերոբ Ղազարյանին:
Մեղադրողները առարկեցին միջնորդությանը` նշելով, որ պաշտպանական կողմի վկայակոչած անձինք, որոնց պաշտպանական կողմը ցանկանում է դատարանում որպես վկա հարցաքննել, պատահական անձինք են, նրանց մասին պաշտպանական կողմը հստակ տեղեկություններ չի նշել:
Դատարանը մերժեց ներկայացված միջնորդությունը` նշելով, որ այն անհիմն է:
Այնուհետեւ պաշտպանական կողմը միջնորդություն ներկայացրեց Ժիրայր Սեֆիլյանի քաղաքական գործունեության ժամանակ տված որոշ հարցազրույցների, ելույթների տեսանյութերն հետազոտելու մասին: Դատարանը այս միջնորդությունը եւս մերժեց` նշելով, որ գործում առկա տեսանյութերն արդեն հետազոտվել են եւ պաշտպանական կողմի մատնանշած տեսանյութերը պարզ չէ, թե ինչքանով են վերաբերում քրեական գործին:
Նշենք, որ այս գործով դատաքննությունը լրացնելու փուլն է, պաշտպանական կողմը միջնորդություններ է ներկայացնում:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում: