Իրանը Թուրքիային կոչ է արել սիրիական Աֆրին քաղաքի վրա հարձակումը դադարեցնել: Իրանի ԱԳՆ մամուլի քարտուղար Բահրամը հայտարարել է, որ Թուրքիայի գործողությունը արաբական երկրում անկայունություն կհաստատի եւ ու ահաբեկիչներին կվերադարձնի, հաղորդում է Mehr-ը:
«Անկարան պետք է վերանայի իր քաղաքականությունը Աֆրինի հանդեպ», - ասել է նա՝ թուրքական կառավարությանը կոչ անելով անմիջապես դադարեցնել Սիրիայում հարձակումը: Ըստ նրա՝ «ռազմական գործողությունների շարունակությունը կնպաստի Սիրիայում անկայունության եւ ահաբեկչության վերադարձին»: Նա նաեւ կոչ է արել Թուրքիային Աստանայում խաղաղ գործընթացի շրջանակներում հետեւել Սիրիայում կատարվող բոլոր զարգացումներին:
Ավելի վաղ Իրանի դիվանագետը կոչ էր արել Անկարային պաշտպանել Սիրիայի տարածքային ամբողջականությունը եւ խուսափել այդ երկրում ճգնաժամի էսկալացիայից:
Թուրքիայի Զինված ուժերի գլխավոր շտաբը հունվարի 20-ից Աֆրինում քրդերի կազմավորումների դեմ «Ձիթենու ճյուղ» գործողություն է իրականացնում: Դամասկոսը խստորեն դատապարտել է Աֆրինում Թուրքիայի գործողությունները՝ նշելով, որ այն Սիրիայի անբաժանելի մասն է: