Քրիստոնեա-դեմոկրատական միության (ՔԴՄ) եւ Քրիստոնեա-սոցիալական միության (ՔՍՄ), որոնք հանդես են գալիս բլոկով, ինչպես նաեւ Գերմանիայի Սոցիալ-դեմոկրատական կուսակցության (ԳՍԴԿ) բանակցողների պատվիրակությունները հաջողությամբ ավարտել են կառավարական «մեծ կոալիցիա» ձեւավորելու շուրջ բանակցությունները:
Այս մասին մամուլի ասուլիսի ժամանակ ասել են ՔԴՄ նախագահ, Գերմանիայի կանցլեր Անգելա Մերկելը եւ ԳՍԴԿ ղեկավար Մարտին Շուլցը: Կողմերը համաձայնության են եկել խոշոր կոալիցիոն պայմանագրի շուրջ, ի թիվս այլ հարցերի, կուսակցությունների միջեւ նախարարների կաբինետում տեղաբաշխումներ անելով, հաղորդում է DW-ն:
Անգելա Մերկելի խոսքով՝ կնքված կոալիցիոն համաձայնագիրը լավ հիմք է կայուն կառավարության համար: Նա ընդգծել է, որ բանակցությունների անցկացման համար ներդրած ջանքերը զուր չէին: Իր հերթին, Մարտին Շուլցը նշել է, որ համաձայնագիրը «մեծապես կրում է սոցիալ-դեմոկրատական ձեռագիր»:
Գերմանական գործակալությունների տվյալներով՝ սոցիալ-դեմոկրատների ներկայացուցիչները կղեկավարեն ֆինանսների, աշխատանքի եւ արտաքին գործերի նախարարությունները: Բացի այդ, ԳՍԴԿ-ն կնշանակի ընտանիքի, արդարադատության եւ շրջակա միջավայրի հարցերով նախարարներին:
Սոցիալ-դեմոկրատների ներկայիս ղեկավար Մարտին Շուլցը կարող է գլխավորել արտաքին գործերի նախարարի պաշտոնը, բայց այս լուրը պաշտոնապես դեռ չի հաստատվել: Այդ դեպքում Անդրեա Նալեսը ԳՍԴԿ-ում կզբաղեցնի նրա տեղը: Ֆինանսների նախարար պետք է դառնա Համբուրգի քաղաքապետ Օլաֆ Շոլցը:
ՔԴՄ ներկայացուցիչները կգլխավորեն էկոնոմիկայի, պաշտպանության, կրթության, գյուղատնտեսության եւ առողջապահության նախարարությունները: