Արտասահմանյան երկրների հետ Արցախի խորհրդարանական համագործակցության զարգացմանը խանգարելու Ադրբեջանի փորձերը կարճաժամկետ արդյունք են ունենում: Այս մասին Արցախի Ազգային ժողովի նախագահ Աշոտ Ղուլյանը նշեց NEWS.am-ի հետ զրույցում՝ ի պատասխան Արցախի խորհրդարանի եւ այլ երկրների միջեւ հարաբերությունների զարգացմանը խանգարելու Ադրբեջանի փորձերին առնչվող հարցին:
«Որովհետեւ, մեծ հաշվով, հատկապես միջխորհրդարանական հարաբերությունների համակարգում, դժվար է սահմանափակել հարաբերությունների զարգացման եղանակները եւ հնարավորությունները: Կարծում եմ՝ աշխարհում չի գտնվի երկրորդ այդպիսի պետություն, որն իրեն ցինիզմ թույլ տա սահմանափակելու այլ պետության խորհրդարանի հնարավորությունները»,- նշեց Աշոտ Ղուլյանը
Նրա խոսքով՝ Եվրոպայի երկրների մակարդակում երկրներ կան, որ Արցախի հետ խորհրդարանական հարաբերությունների ընկալման շատ լավ ցուցանիշներ ունեն: «Եթե Ադրբեջանին նույնիսկ ինչ-որ պահի հաջողվում է ներգործել, ապա ոչ երկար, քանի որ նման մեթոդները չեն կարող քաղաքակիրթ պետությունների խորհրդարանների համար ընդունելի լինել: Արժեհամակարգը՝ տեղաշարժման ազատությունը, մարդու իրավունքների պաշտպանությունը, որին հավատարիմ են եվրոպական երկրները, Ադրբեջանի հետ կապ չունի եւ չի կարող նրա ջանքերն աջակցել»,- շեշտեց Աշոտ Ղուլյանը: