Ահաբեկչության դեմ պայքարը ջնջում է պատերազմի եւ խաղաղության ավանդական սահմանները, կարծում է ՆԱՏՕ գլխավոր քարտուղար Յենս Ստոլտենբերգը՝ ընդգծելով, որ կա հարձակումների «մշտական սպառնալիք»:
Press Association-ի հետ հարցազրույցում Ստոլտենբերգը նշել է, որ դժվար է կանխատեսել, երբ կավարտվի ԻՊ դեմ պայքարը:
«Կա ահաբեկչական հարձակումների մշտական սպառնալիք, մենք տեսանք, որ դա կրկին ու կրկին տեղի է ունենում ՆԱՏՕ-ի դաշնակից երկրներում», - ասել է նա՝ հավելելով, որ անհրաժեշտ է ակտիվացնել ահաբեկչության դեմ պայքարը:
Նշելով, որ Իրաքում եւ Սիրիայում ԻՊ կողմից զավթված տարածքների 98 տոկոսի ազատագրումը կարեւոր ձեռքբերում է, Ստոլտենբերգն ասել է, որ սպառնալիքը դեռեւս մնում է: «Դեռ վտանգը կա, դա սերունդների պայքար է: Այն նաեւ ցույց է տալիս, որ փոխվել է խաղաղության եւ պատերազմի հասկացությունը», - ասել է ՆԱՏՕ-ի գլխավոր քարտուղարը:
«Դա տեղի է ունեցել Իրաքում եւ Սիրիայում, ինչպես նաեւ Աֆղանստանում, Հյուսիսային Աֆրիկայում եւ Ասիայում, կիբերտարածքում, եւ ես կարծում եմ, որ շատ դժվար կլինի ճշգրիտ կերպով ցույց տալ, երբ այս պատերազմը կամ պայքարը կավարտվի»: