Մոսկվան ակնկալում է, որ Գերմանիայի հարեւանները համապատասխան որոշումներ կայացնելիս հաշվի կառնեն «Հյուսիսային հոսք 2»-ի կոմերցիոն շահը։ Այս մասին հայտարարել է Ռուսաստանի արտաքին գործերի նախարար Սերգեյ Լավորվը Մյունխենի անվտանգության համաժողովի շրջանակներում Ռուսաստանի եւ Գերմանիայի գործարար շրջանակների ներկայացուցիչների հետ հանդիպման ժամանակ, փոխանցում է ՏԱՍՍ-ը։

«Նրանց, ովքեր փորձում են այն տորպեդահարել այն, պակաս կարեւոր չէ հիշեցնելը, որ Յամալից մինչեւ Գերմանիա ձգվող գազատարը երկու անգամ ավելի կարճ է, քան ներկայիս գազատարը, որը Ուկրաինայի միջով ձգվում է մինչեւ Գերմանիա,ավելին՝ արժեքը եւս երկու անգամ ավելի քիչ է, քան ներկայիս գազատարի պարագայում է»,-նշել է նա։

Գերմանիայի արտգործնախարար Զիգմար Գաբրիելը, իր հերթին, Գերմանիայի եւ Ռուսաստանի գործարար շրջանակների ներկայացուցիչների հետ աշխատանքային նախաճաշի ժամանակ հայտնել է․ «Ռուսաստանը «Հյուսիսային հոսք 2»-ի կառուցման ժամանակ պահպանել է բոլոր կանոնները։ Մենք չպետք է ընթացքում փոխենք այդ կանոնները»:

Բացի այդ, Գերմանիայի արտաքին գործերի նախարարը նշել է, որ Եվրոպական միությունը կարող է աստիճանաբար սկսել Ռուսաստանի վրայից պատժամիջոցները հանել, եթե հաջողվի իրականացնել Դոնբասում ՄԱԿ առաքելությունն կյանքի կոչել։