Ադրբեջանը պատրաստ չէ ԵԱՀԿ Մինսկի խմբի շրջանակներում բանակցությունների միջոցով ղարաբաղյան խնդրի լուծմանը: Այս մասին NEWS.am-ի թղթակցի հետ զրույցում հայտարարել է Հայաստանի պաշտպանության նախկին նախարար Վաղարշակ Հարությունյանը` մեկնաբանելով Ադրբեջանի նախագահ Իլհամ Ալիեւի՝ Երեւանը ադրբեջանական պետության կազմ «վերադարձնելու» վերջին հայտարարությունները:
Պաշտպանության նախկին նախարարը շեշտել է, որ ադրբեջանական պետության ղեկավարի նման հայտարարությունները ոչ մի կերպ չեն նպաստում ղարաբաղյան հիմնախնդրի լուծմանը, այլ հակառակը տանում են այն փակուղի, որը ցույց է տալիս Բաքվի իրական մտադրությունները եւ այդ հարցի լուծման իր տեսլականը:
«Բաքուն հասկանում է, որ մեծածավալ պատերազմով հարցը չի կարող լուծվել, իսկ բանակցային ճանապարհը նրա համար անընդունելի է, եւ Ադրբեջանը սադրանքների է դիմում», - ասել է Հարությունյանը:
Բացի այդ, փորձագետը նշել է, որ նման հայտարարություններով Ադրբեջանը փորձում է վախեցնել եւ շանտաժի ենթարկել ինչպես հայկական կողմին, այնպես էլ ԵԱՀԿ Մինսկի խմբի համանախագահներին եւ, ընդհանրապես, Բաքվի հետ տնտեսական շահեր ունեցող երկրներին:
Միեւնույն ժամանակ, Հարությունյանը շեշտել է, որ Ալիեւի նման հայտարարություններին պետք է լուրջ վերաբերել, ոչ մի դեպքում չանտեսել, եւ շարունակել հայոց բանակի ամրապնդման եւ վերազինման գործընթացը:
Նախկին պաշտպանության նախարարը համոզված է, որ Ալիեւը այդ հայտարարությունները հենց այնպես չի արել, եւ որ դրանք ապացուցում են, որ Ադրբեջանը, փաստորեն, պանօսմանյան եւ պանթյուրքական գաղափարախոսության կրողն է, որը ցույց է տալիս Բաքվի եւ Անկարայի ընդհանուր քաղաքականությանը Հայաստանի դեմ եւ կարող է ամբողջ տարածաշրջանի ապակայունացմանը հանգեցնել:
Հիշեցնենք, որ փետրվարի 8-ին Ադրբեջանի նախագահ Իլհամ Ալիեւը մտադրություն է հայտնել «վերադառնալ» Երեւան` անվանելով այն պետության երկարաժամկետ նպատակ: