Մեքսիկայի գլխավոր դատախազությունը կիրակի պաշտոնապես հաստատել է հանցավոր խմբավորումների կողմից իր 2 գործակալներին սպանելու փաստը, փոխանցում է «ՌԻԱ Նովոստի»-ն:
Գլխավոր դատախազության ենթակայությամբ գործող Քրեական հետաքննությունների գործակալության 2 ծառայողներ փետրվարի սկզբին կորել էին Նայարիտ նահանգում, երբ հանգստանում էին ազգականների մոտ: Այնուհետեւ առեւանգողները համացանցում տեսանյութ էին հրապարակել, որում գործակալները զինված եւ դիմակավորված ավազակների ֆոնին ծնկաչոք էին: Ավելի ուշ հայտնաբերվել էին 2 մարդու մասունքներ, որոնք ենթադրաբար պատկանում էին առեւանգվածներին:
«Գլխավոր դատախազությունը հայտնում է, որ գենետիկ հետազոտություններ անցկացնելուց հետո հաջողվել է պարզել, որ Նայարիտ նահանգի Խալիսկո քաղաքում հայտնաբերված մարմինները պատկանում են գործակալներին, որոնք կորել էին փետրվարի 5-ին»,- նշված է գերատեսչության հաղորդագրության մեջ:
Ներկայումս մարմինները հանձնել են ազգականներին հուղարկավորելու համար, զոհվածների մերձավորներին ցուցաբերվում է հոգեբանական օգնություն:
«Գլխավոր դատախազությունը Մեքսիկայի անվտանգության մյուս ծառայությունների հետ համակարգմամբ շարունակում է ցավալի իրադարձության մեղավորներին որոնելու աշխատանքները»,- նշել են գերատեսչությունից:
Սպանությանը կարող էին մասնակցել «Խալիսկո-նոր սերունդ» հզոր թմրակարտելի անդամները: