Հնդկաստանի Հայդերաբադ քաղաքում ընթացող ՏՏ համաշխարհային համաժողովի («WCIT 2018»-ը) շրջանակներում հայկական պատվիրակությունը` ՀՀ տրանսպորտի, կապի եւ տեղեկատվական տեխնոլոգիաների նախարարի տեղակալ Արման Խաչատրյանի եւ Ինֆորմացիոն տեխնոլոգիաների ձեռնարկությունների միության (ԻՏՁՄ) ղեկավար կազմի գլխավորությամբ մասնակցել է կարեւոր մի քանի պաշտոնական եւ գործարար հանդիպումների:
ՀՀ տրանսպորտի կապի եւ տեղեկատվական տեխնոլոգիաների նախարարությունից NEWS.am-ին հայտնում են, որ մասնավորապես, համաժողովի ընթացքում տեղի է ունեցել նախարարական կլոր սեղան-քննարկում, որի ընթացքում ներկայացվել են ՏՀՏ ոլորտում ՀՀ ձեռքբերումներն ու նվաճումները, ինչպես նաեւ` գործարար եւ ներդրումային գրավչությունը: Քննարկվել են երկրների միջեւ ազգային թվային օրակարգերի ներդրման գործում փորձի եւ գիտելիքի ակտիվ փոխանակման եւ առաջադեմ տեխնոլոգիաների ներդրման շուրջ համագործակցության հնարավորությունները:
Արման Խաչատրյանը երկկողմանի ձեւաչափով հանդիպել է նաեւ Հնդկաստանի Իրավունքի, արդարադատության եւ ՏՏ նախարար Ռավի Պրասադի, Բանգլադեշի ՏՏ նախարար Զունաիդ Պալակի, Հնդկաստանի Տելանգանա նահանգի ՏՏ նախարար Տարակա Ռաոյի, Շվեդիայի Կրթության եւ գիտության պետական քարտուղար Կարին Ռոդինգի եւ «Ադոբ» ընկերության նախագահ եւ գործադիր տնօրեն Շանտանու Նարեյնայի հետ: Վերջիններիս փոխանցվել է հրավեր՝ այցելելու 2019 թ.-ին Հայաստանում նախատեսված ՏՏ համաշխարհային համաժողովին: Նախնական պայմանավորվածություն է ձեռք բերվել դեպի Հայաստան գործարար այցերի կազմակերպման շուրջ:
ՏՏ համաշխարհային համաժողովի («WCIT 2018»-ը) շրջանակներում «Թումո» ստեղծարար տեխնոլոգիաների կենտրոնն արժանացել է ՏՏ համաշխարհային համաժողովի ՏՀՏ ոլորտի բարձր՝ «Թվային դարի խորհուրդը իրագործելու համար» մրցանակին:
