Փհյոնչհանում Ձմեռային օլիմպիադայի «Ռուսաստանից օլիմպիական ատլետների» թիմի մամուլի քարտուղար Կոնստանտին Վիբորնովը հաստատել է, որ ռուս կերլինգիստ Ալեքսանդր Կրուշելնիցկու դոպինգ փորձանմուշը դրական է եղել: Նրա խոսքով՝ Օլիմպիադան սկսվելուց առաջ մարզիկի բոլոր փորձանմուշները բացասական են եղել, փոխանցում է Gazeta-ն:
«Այսպիսով՝ արգելված նյութի գիտակցված կամ համակարգված օգտագործման փաստը չի հաստատվում»,- շեշտել է Վիբորնովը:
Նա հավելել է, թե դեռեւս հայտնի չէ, թե դեղամիջոցն ինչ կերպ է հայտնվել Կրուշելնիցկու օրգանիզմի մեջ:
«Մենք անկեղծորեն ցավում ենք այս միջադեպի համար: Սակայն տեղի ունեցածի հանգամանքները այժմ չեն պատասխանում հարցերին, թե մելդոնիումը ինչպես եւ երբ է հայտնվել մարզիկի օրգանիզմի մեջ»,- նշել է մամուլի քարտուղարը:
