Համայնքներում, տարիների ընթացքում համակարգային մոտեցման բացակայությունը բերել էր նրան, որ համայնքներում կար շուրջ 1 մլրդ դրամի աշխատավարձի պարտք, որը ձեւավորվել էր արձակուրդ չգնալու պատճառով։ Այս մասին, այսօր՝ փետրվարի 23-ին, լրագրողների հետ հանդիպման ժամանակ նշեց ՀՀ տարածքային կառավարման եւ զարգացման նախարար Դավիթ Լոքյանը՝ ներկայացնելով 2017թ. կատարած աշխատանքներն ու 2018-ի անելիքները:
«Համայնքապետեր ունեինք, որ գրեթե 10 տարի արձակուրդ չէին գնացել եւ այդ գումարները կուտակվում էին, իսկ համայնքի ղեկավար չընտրվելու դեպքում կուտակված գումարը միանգամից ստանում էին, ինչի արդյունքում համայնքի բյուջեն ֆինանսական խնդիրներ էր ունենում»,-ասաց նախարարը՝ հավելելով, որ 2017-ին մոտ 200 մլն դրամի համայնքային պարտք նվազեցրել են եւ համոզված են, որ 2018 թվականին այս գործընթացը շարունակելով կհասնեն նրան, որ համայնքն այս կարգի պարտք չի ունենա եւ բյուջեի վրա բեռ չի լինի:
«Նախկինում ունեինք համայնքներ, որտեղ բյուջեի 84 տոկոսը ծախսվում էր աշխատավարձ վճարելու վրա: Համայնքները պետք է ծառայություն մատուցեն քաղաքացիներին եւ դրանից միջոցներ ստանան, ոչ թ եկամուտները պետք է ծախսեն միայն աշխատավարձի վրա»,-ասաց նախարարը: Լոքյանը նշեց, որ տարեկան համայնքները պետությունից շուրջ 48 մլրդ դրամի չափով դոտացիա են ստանում, սակայն այդ միջոցներն այնպես էին ծախսվում, որ չէր բերում համայնքների կապիտալի ավելացման. «Իսկ արդեն 2018-ի միայն հունվարի 1-ի դրությամբ համայնքների ֆոնդային բյուջեներում ձեւավովել է 6 մլրդ դրամի գումար, որն ուղղվելու կապիտալի մեծացմանը»:
