Բոուլդերում (Կոլորադո, ԱՄՆ) Տիեզերական հետազոտությունների ինստիտուտի գիտնականները պարզել են, որ ջուրը տարածված է Լուսնի ողջ մակերեւույթով եւ ոչ թե սահմանափակվում է բեւեռային շրջաններով: Այս մասին հաղորդում է Lenta.ru-ն` վկայակոչելով NASA-ին եւ Nature Geoscience- ում հրապարակված ուսումնասիրությունը:
Նման եզրակացության գիտնականները հանգել են՝ վերլուծելով երկու ուղեծրային զոնդերի տվյալները: NASA-ում կարծում են, որ այս արդյունքները կօգնեն հասկանալ, թե արդյոք հնարավո՞ր է Լուսնի վրա եղած ջուրն օգտագործել որպես ռեսուրս: Եթե այն հեշտությամբ մատչելի լինի, ապա գաղութարարները կարող են այն որպես խմելու ջուր վերցնել, ինչպես նաեւ դրանից թթվածինն առանձնացնել:
«Ինչպես պարզվել է, կարեւոր չէ՝ օրվա որ ժամին, եւ Լուսնի որ հատվածն ենք մենք դիտարկում, ջուրը միշտ առկա է Երկրի արբանյակի մակերեւույթին եւ դրա առկայությունը կախված չէ Լուսնի հանքային ապարի կազմից», - բացատրել է հետազոտության համահեղինակ Ջոշուա Բանդֆիլդը: