Ժնեւ կատարած պաշտոնական այցի շրջանակներում Ադրբեջանի արտաքին գործերի նախարար Էլմար Մամեդյարովը հանդիպել է Կարմիր խաչի միջազգային կոմիտեի նախագահ Պետեր Մաուերի հետ։
ԱՊԱ–ի փոխանցմամբ՝ ի թիվս այլնի Մամեդյարովը խոսել է Շահբազ Գուլիեւի եւ Դիլհամ Ասկերովի ազատման հնարավորությունների մասին։ Ադրբեջանի ԱԳ նախարարը փորձել է նրանց ներկայացնել որպես մոր գերեզմանի մոտ կալանավորված «անմեղ զոհեր»։ Հետաքրքիր է, որ հայ գերիների՝ Արսեն Բաղդասարյանի եւ հոգեկան խնդիրներ ունեցող Զավեն Կարապետյանի մասին Մամեդյարովը բառ անգամ չի ասել։
Զավեն Կարապետյանը գերի էր ընկել հունիսի 20-ի երեկոյան։ Տղամարդը հոգեկան խնդիրներ է ունեցել, առերեւույթ ակնհայտ են եղել մտավոր թերությունները, սակայն դա չի խանգարել ադրբեջանական կողմին նրան զինվորական ներկայացնելուն։
