Նորընտիր նախագահ Արմեն Սարգսյանն, անկախ խորհրդարանի պահվածքից, ընդունվել է ժողովրդի կողմից եւ, ըստ էության, նա լեգիտիմ նախագահ է։ Այս մասին մարտի 3-ին՝ լրագրողների հետ հանդիպման ժամանակ հայտարարել է Գերագույն խորհրդի նախկին պատգամավոր Ազատ Արշակյանը։  

Այսպես, նրա խոսքով, հասարակությունը նրանց սատարում է, անկախ նախագահի ընտրության ձեւից, որը, նրա կարծիքով, այդքան էլ լեգիտիմ չէր։

 «Հայաստանը շահեց քաղաքական կյանքում Արմեն Սարգսյանի հայտնվելուց։ Նրա գալը դրական փոփոխություններ կբերի»,–նշել է նա։

Նրա խոսքով, խորհրդարանը նրան ընտրեց, բայց քաղաքական ընտրություններ, ըստ էության, չկային։ Նա հավելել է, որ խմբակցություններն այդպես էլ իրենց թեկնածուներին պատշաճ կերպով չներկայացրեցին որպես Արմեն Սարգսյանին այլընտրանք։  Բացի այդ, նա կարծում է, որ Ազգային ժողովն իրեն ճիշտ չդրսեւորեց՝ Արմեն Սարգսյանին անհարմար դրության մեջ դնելով. «Ճիշտ է, նրանցից դա լրիվ սպասելի էր, ավելին՝ մեր խորհրդարանից եւ պատգամավորներից ոչ ոք ոչինչ չի ակնկալում։ Եթե գեղեցկության մրցույթ անցկացվի, ես մեր խորհրդարանի օգտին հաստատ չեմ քվեարկելու, որովհետեւ նրանք տգեղ վարվեցին»,–հայտարարել է Արշակյանը։

Եզրափակելով՝ նա կարծիք հայտնեց, որ խորհրդարանը թարմացման կարիք ունի, քանի որ երկիրը սխալ ճանապարհով է գնում, որը կարող է լճացման բերել։