Ֆլորիդայի Կանավերալ հրվանդանից արձակվել է Falcon 9 հրթիռ–կրիչն Իսպանիայի Hispasat 30W-6 հեռուստահաղորդակցման արբանյակի հետ մեկտեղ, հրթիռի արձակման հեռարձակումն իրականացրել էր SpaceX ընկերությունը, փոխանցում է «ՌԻԱ Նովոստի»–ն։

Հրթիռը մեկնարկել է երեքշաբթի Կանավերալ հրվանդանի տիեզերակայանից։ Ավելի վաղ նախատեսվում էր, որ մեկնարկը կիրականացվի փետրվարի վերջին, սակայն տեխնիկական պատճառներով մեկնարկը հետաձգվել էր։

Հրթիռը ուղեծիր դուրս կբերի իսպանական Hispasat 30W-6 արբանյակը։ Այն նախատեսված է հեռուստատեսային ազդանշանի, տեսաազդանշանի հաղորդման, ինչպես նաեւ Հյուսիսային Ամերիկայում, Հարավային Ամերիկայում, Եվրոպայում եւ Հյուսիսային Աֆրիկայում լայնաշերտ ինտերնետ կապը հասանելի դարձնելու համար։

Ավելի վաղ SpaceX ընկերության ղեկավար Իլոն Մասկը հայտարարել էր, որ արբանյակը կդառնա ամենածանր բեռը, որ այս հրթիռը ինչ–որ ժամանակ  ուղեծիր է դուրս բերել։

Արձակումից կես  ժամ անց SpaceX ընկերությունը հաղորդել է Hispasat 30W-6–ի հաջողությամբ ուղեծիր դուրս գալու մասին։