Ռուսաստանի, Թուրքիայի եւ Իրանի արտգործնախարարները մարտի 16-ին Աստանայում կքննարկեն սիրիական հակամարտության կարգավորման հարցը, հաղորդում է Ղազախստանի արտաքին գործերի նախարարության կայքը։
«Սիրիայի հարցով Աստանայի գործընթացի երաշխավոր պետություններից ստացված տեղեկության համաձայն՝ Իրանի Իսլամական Հանրապետության, Ռուսաստանի Դաշնության եւ Թուրքիայի Հանրապետության արտաքին գործերի նախարարները մտադիր են հանդիպել Ղազախստանի մայրաքաղաքում 2018 թվականի մարտի 16-ին»,–նշված է հաղորդագրության մեջ:
Նշվում է, որ մասնակիցները նախատեսում են վերլուծել Սիրիայում իրավիճակի կարգավորմանն ուղղված փոխգործակցության առաջին տարվա արդյունքները եւ նախանշել հետագա համատեղ գործողությունները:
ՌԴ ԱԳՆ–ում պարզաբանել են, որ հանդիպմանը ներկա կլինի միայն ՄԱԿ–ի գլխավոր քարտուղարի հատուկ բանագնաց Ստեֆան դե Միստուրան։
