Չորեքշաբթի Ռիո դե Ժանեյրոյի քաղաքապետարանի ժողովի պատգամավոր Մարիել Ֆրանկուին սպանել են քաղաքի կենտրոնում, հայտնում է Globo-ն:
Հեռուստաալիքի տեղեկություններով՝ անհայտ հանցագործները կրակել են ավտոմեքենայի վրա, որով Ֆրանկուն վերադառնում էր ռասայական խտրականությանը նվիրված միջոցառումից: Պատգամավորի հետ զոհվել է նաեւ նրա վարորդը: Նախնական տեղեկություններով՝ սպանությունը կապված է քաղաքական գործչի գործունեության հետ, քանի որ զոհերի անձնական իրերը մնացել են ավտոմեքենայի մեջ:
Մասնագիտությամբ սոցիոլոգ Ֆրանկուն ներկայացնում էր ձախ Սոցիալիզմի եւ ազատությկան կուսակցությունը: Նա համապատասխան մանդատը ստացել էր 2016 թվականին:
Փետրվարի 16-ին Բրազիլիայի նախագահ Միշել Տեմերը հրաման էր ստորագրել, որի համաձայն Ռիո դե Ժանեյրոյի իրավապահ մարմինների հրամանատարությունը փոխանցվել էր բանակին: 1980-ական թվականների կեսին ռազմական դիկտատուրայի տապալումից ի վեր հարավամերիկյան երկրի իշխանությունները այսպիսի արտակարգ միջոցառում առաջին անգամ են ընդունել:
Պաշտոնական տեղեկություններով՝ վերջին ամիսներին Ռիո դե Ժանեյրո նահանգում հասարակական անտանգության ոլորտում իրավիճակը զգալիորեն վատթարացել է: Այսպես՝ շրջանային կառավարության վիճակագրության համաձայն՝ 2017-ին սպանությունների թիվն աճել է 8 տոկոսով նախորդ տարվա համեմատությամբ եւ 26 տոկոսով 2015 թվականի համեմատությամբ: