Երկու դատախազների կողմից ավագ քննիչին ծեծելու վերաբերյալ ստացված հաղորդման հիման վրա հարուցված քրեական գործը կարճվել է: Այս մասին հայտնում են NEWS.am-ի աղբյուրները:
Մեր տեղեկություններով, Հատուկ քննչական ծառայությունում Քրեական օրենսգրքի 118-րդ հոդվածի հատկանիշներով (ծեծելը կամ այլ բռնի գործողություններ կատարելը) հարուցված քրեական գործը կարճվել է հանցակազմի եւ բողոքի բացակայության հիմքերով:
Նշենք, որ վիճաբանությունը եւ ծեծկռտուքը տեղի էր ունեցել 2017թ.-ի նոյեմբերի 20-ին ավագ քննիչ 26-ամյա Սուրեն Նազարյանի եւ դատախազներ 32-ամյա Հայկ եւ Նարեկ Խաչատրյանների (երկվորյակներ) միջեւ: Ըստ հաղորդման, քննիչին մարմնական վնասվածքներ էին հասցրել դատախազ եղբայրները:
Մեր տեղեկություններով, նախաքննական մարմինը պարզել է, որ Խաչատրյան եղբայրներից մեկն է եղել վնասվածքներ հասցնողը, սակայն, քրեական գործը կարճվել է, քանի որ քննիչը բողոք չի ունեցել նրա դեմ: Մյուս դատախազի մասով քրգործը կարճվել է հանցակազմի բացակայության հիմքով: