Թուրքիայում ավելի քան 500 հազար քաղաքացուց խաբեությամբ մինչեւ 1 միլիարդ դոլար կորզած 25–ամյա Մեհմեդ Այդընը սոցկայքերով պատասխանել է խաբված քաղաքացիներից մեկի հարցին։

Թուրքական Cumhuriyet–ի փոխանցմամբ՝ սոցկայքերով խաբված քաղաքացիներից մեկը հարցրել է Մեհմեդ Այդընին, թե արդյոք լավ ծախսո՞ւմ է իրեից փողերը, որին ի պատասխան Մեհմեդ Այդընը տեսանյութ է տեղադրել։ Տեսանյութում դարակի մեջ շարված դոլարի տրցակներ են, իսկ Մեհմեդ Այդընը բրենդային ոսկե թանկարժեք ժամացույցով շարում է տրցակները։

Այս տեսանյութը խիստ կատաղեցրել է խաբված հարյուրահազարավոր քաղաքացիներին։

25–ամյա Մեհմեդ Այդընը համակարգչային խաղ էր ստեղծել, որում օգտատերերը վիրտուալ անասուններ կամ հավ են գնում իրական փողերով։ Կազմակերպիչը այդ հավեր կամ անասուններ գնողներին խոստացել էր 220 տոկոս շահույթ մեկ տարի անց՝ հայտարարելով, որ իրենց տված գումարներով իրական անասնաֆերմա է կառուցվում եւ հիմնական շահույթը գալու է հենց այդ անասնաֆերմայից։

25–ամյա երիտասարդին հաջողվել է նման ձեւով հավաքել մինչեւ 1 միլիարդ դոլար։

Երբ տոկոսները ստանալու համար քաղաքացիները գնացել են «Գյուղատնտեսական բանկ» խաղի գրասենյակ, պարզվել է, որ ընկերությունը լուռ հեռացել էր տարածքից՝ չթողնելով ոչ պարզաբանում։

Անմիջապես հայտնի է դառնում, որ խաղի գլխավոր տնօրեն Մեհմեդ Այդընը անհետացել է, իսկ խաղի բանկային հաշիվներն էլ զրոյական են, այսինքն Մեհմեդ Այդընը տարել է ամբողջ գումարը։